संरक्षण विभागासाठीच्या निधीत केवळ 6 टक्के वाढ करण्यात आली आहे. 3.18 लाख कोटींवरून हा निधी यंदा 3.37 लाख कोटी करण्यात आला आहे. देशासमोर संरक्षणविषयक अनेक आव्हाने असताना संरक्षण निधीत करण्यात आलेल्या किरकोळ वाढीमुळे या क्षेत्राच्या पदरी निराशाच आली आहे. भारत व पाकिस्तान यांच्यातील वाढता तणाव व चीन-बांगलादेश आदी शेजारील देशांकडून सुरू असलेल्या कारवाया आणि काश्मीर सारख्या राज्यांमधील घडामोडींच्या पार्श्वभूमीवर देशाच्या संरक्षण निधीत भरघोस वाढ होईल अशी अपेक्षा होती. मात्र याबाबतीत अर्थमंत्र्यांनी घोर निराशाच केली आहे.
संरक्षण क्षेत्रासाठीच्या निधीत गतवर्षीच्या तुलनेत केवळ 6 टक्के वाढीव तरतूद करण्यात आली आहे. गतवर्षी संरक्षण विभागासाठी 3.18 लाख कोटींची तरतूद होती. यावर्षी पेन्शनवरील खर्चासह अन्य खर्चाचा विचार करून ही तरतूद 4.7 लाख कोटी करण्यात आली आहे. यामध्येच पेन्शनसाठीचे 1.33 लाख कोटीचा समावेश आहे. संरक्षण दलासाठीची शस्त्रखरेदी व आधुनिकिकरण यासाठी 1 लाख 13 हजार कोटीची या निधीत समावेश आहे.