क्रिकेट हा मुळातच अनिश्चिततेचा खेळ आहे. त्यातही टी-20 मध्ये ही अनिश्चितता आणखी पराकोटीला पोहोचते. पण, तरीही आधुनिक क्रिकेटमधील महान फलंदाज सचिन तेंडुलकरने यंदाची आयपीएल स्पर्धा जिंकण्यासाठी सर्वात प्रबळ दावेदार कोण असेल, याचा अंदाज वर्तवला आहे आणि तो संघ म्हणजे त्याच्याच लाखमोलाचे मुंबई इंडियन्स!
माजी सलामीवीर आकाश चोप्राने यूटय़ूब चॅनेलसाठी सचिनची मुलाखत घेतली, त्यावेळी सचिनने जेतेपदासाठी मुंबई इंडियन्स या आपल्या घरच्या संघाला पसंती दिली. आकाश चोप्राने दिल्ली कॅपिटल्स हा संघ सर्वाधिक समतोल असल्याचे नमूद केले तर त्याला उत्तर देताना सचिनने हा वेगाचा खेळ असल्याचे म्हटले. 53 दिवसांच्या या स्पर्धेत सर्वच संघांना बरेच चढउतार पहायचे आहे, याचाही त्याने उल्लेख केला.