शहापूर येथील घटनेने खळबळ, केवळ 15 मिनीटांत चोरटय़ांनी साधला डाव
प्रतिनिधी / बेळगाव
संकेश्वर येथील एका सराफाच्या कारची काच फोडून चोरटय़ांनी 22 तोळय़ाचे दागिने पळविले आहेत. मंगळवारी रात्री शहापूर येथील बँक ऑफ इंडियाजवळ ही घटना घडली आहे. या घटनेने परिसरात एकच खळबळ माजली असून चोरटय़ांनी केवळ 15 मिनीटांत काच फोडून दागिने पळविले आहेत.
संकेश्वर येथील संतोष राजशेखर मगदूम (वय 36) या सराफी व्यवसायिकाने या संबंधी शहापूर पोलीस स्थानकात फिर्याद दिली आहे. मंगळवारी रात्री 9 ते 9.15 यावेळेत ही घटना घडली आहे. घटनेची माहिती समजताच पोलीस निरीक्षक राघवेंद्र हवालदार व त्यांच्या सहकाऱयांनी घटनास्थळी भेट देवून पंचनामा केला. चोरटय़ांचा माग काढण्यासाठी प्रयत्न करण्यात येत आहे.