नवी दिल्ली
सरकारी तेल विपणन कंपन्यांनी मंगळवारी सलग 17 व्या दिवशी पेट्रोल-डिझेलच्या किमती वाढविल्या आहेत. या दरवृद्धीमुळे राजधानी नवी दिल्लीत पेट्रोल आणि डिझेलची किंमत आता एकसमान होण्याच्या स्थितीनजीक पोहोचली आहे. इंडियन ऑइल कॉर्पोरेशननुसार दिल्लीत पेट्रोलची मंगळवारी किंमत 20 पैशांनी वाढून 79.76 रुपये प्रतिलिटर झाली आहे. 28 ऑक्टोबर 2018 नंतरची हा उच्चांकी दर आहे. तर डिझेलच्या दरात 55 पैशांच्या वृद्धीसह विक्रम 79.40 रुपये प्रतिलिटरवर किंमत पोहोचली आहे. पेट्रोलच्या तुलनेत डिझेलचे दर वेगाने वाढल्याने दोघांच्या मूल्यामधील अंतर केवळ 36 पैसे राहिले आहे. या 17 दिवसांमध्ये दिल्लीत पेट्रोल 8.50 रुपये म्हणजेच 11.93 टक्के आणि डिझेल 10.01 रुपये म्हणजेच 14.43 टक्के महागले आहे.
आंतरराष्ट्रीय बाजारपेठेत कच्च्या तेलाचे दर अद्याप वाढलेले नाहीत. तरीही देशांतर्गत बाजारपेठेत पेट्रोल-डिझेलच्या किमतीत सातत्याने वाढ होत आहे. या दरवाढीमुळे सर्वसामान्यांना महागाईची झळ पोहोचू लागली आहे. इंडियन बास्केटमध्ये कच्च्या तेलाची किंमत 40 डॉलर्स प्रति बॅरलच्या आसपास राहिली आहे. तरीही पेट्रोल-डिझेलच्या दरात सर्वसामान्यांना दिलासा मिळत नसल्याचे चित्र आहे.