प्रतिनिधी / इस्लामपूर
सांगली जिल्ह्यामध्ये कोरोना रुग्ण पॉझिटीव्हीटीचा दर 10 टक्क्यांपर्यंत खाली आला असताना वाळवा तालुक्यातील कोरोना पॉझिटीव्हीटीचा दर 13 टक्के आहे. वाळवा तालुक्याचा पॉझिटीव्हीचा दर कमी करण्यासाठी कोरोना प्रतिबंधक निर्बंधांची कडक अंमलबजावणी करावी, मास्क न वापरणाऱ्यावर दंडात्मक कारवाई करावी, मोकाटपणे फिरणाऱ्यांची कोरोना टेस्ट करावी, पोलीसांनी गस्त वाढवावी, असे आदेश जलसंपदा व लाभक्षेत्र मंत्री व सांगलीचे पालकमंत्री जयंत पाटील यांनी दिले.
गटविकास अधिकारी, वाळवा यांच्यावतीने व्हिडीओ कॉन्फरन्सव्दारे वाळवा तालुका कोरोना सद्यस्थिती आढावा बैठकीत ते बोलत होते. यावेळी पंचायत समिती सभापती शुभांगी पाटील, वाळव्याचे गटविकास अधिकारी शशिकांत शिंदे, तालुका आरोग्य अधिकारी डॉ. साकेत पाटील, इस्लामपूरचे पोलीस निरीक्षक एन. एस. देशमुख, आष्टाचे पोलीस निरीक्षक बी. आर. निंभोरे, प्राथमिक आरोग्य केंद्राचे वैद्यकीय अधिकारी, विविध ग्रामपंचयातींचे सरपंच यावेळी सहभागी झाले होते. पालकमंत्री पाटील यांनी कामेरी, येडे निपाणी, पेठ, बागणी, नेर्ले, वाटेगाव, मालेवाडी, कासेगाव, रेठरेधरण, भडकंबे, वाळवा, शिरगाव, साखराळे, गोटखिंडी, बावची, ऐतवडे खुर्द व बुद्रूक, येलूर, चिकुर्डे, तांबवे, कुरळप, कार्वे, नवेखेड या गावच्या सरपंचांशी संवाद साधला .