दिघंची / वार्ताहर
वाढत्या कोरोना रुग्णसंख्येच्या पार्श्वभूमीवर मंगळवारी खासदार संजयकाका पाटील यांनी दिघंची प्राथमिक आरोग्य केंद्राला भेट देऊन आरोग्य केंद्राचा आढावा घेतला.यावेळी नागरिकांनी काळजी घेण्याचे आवाहन देखील खासदार संजयकाका पाटील यांनी केले. यावेळी पंचायत समितीचे माजी सभापती हर्षवर्धन देशमुख, अनिल पाटील हे उपस्थित होते.
दिघंची प्राथमिक आरोग्य केंद्राला शक्य त्या सर्व सुविधा मिळवून देण्यासाठी प्रयत्नशील असल्याचे सांगत दिघंचीला फॅबी फ्लू गोळ्या व इतर वैद्यकीय साहित्य तात्काळ मिळण्यासाठी सूचना केल्याचे खासदार संजयकाका पाटील यांनी यावेळी सांगितले. तर लसीकरण केंद्र व कोविड तपासणी केंद्र वेगळे करण्याबाबत जिल्हाधिकारी यांच्याशी चर्चा करून लसीकरण केंद्र अन्यत्र सुरू करु अशी ग्वाही दिली.
तर तात्काळ दिघंचीसाठी ऑक्सिजन कॉन्सनट्रेटर उपलब्ध करून देण्याची ग्वाही दिली. प्रणव गुरव,बंडू मोरे,केशव मिसाळ यांच्यासह कार्यकर्त्यांनी दिघंचीसाठी 25 बेड चे कोविड हॉस्पिटल सुरू करण्याची आग्रही मागणी खासदार संजयकाका पाटील यांच्याकडे केली.
यावेळी दिघंची प्राथमिक आरोग्य केंद्राचे वैद्यकीय अधिकारी सूरज पवार, डॉ असिफ तांबोळी,जि. प.सदस्य मोहन रणदिवे,यांच्यासह वैद्यकीय कर्मचारी उपस्थित होते.