प्रतिनिधी / इस्लामपूर
वाळवा तालुक्यातील पेठ (भीमनगर) येथील विशाल राजेंद्र कुरणे(२९) या तरुणाचा पिण्याच्या पाण्याच्या नळाला विद्युत पंप जोडत असताना विजेचा धक्का बसून मृत्यू झाला. ही घटना शनिवारी दुपारी तीन वाजण्याच्या सुमारास घडली.
पेठ येथे प्रादेशिक गाव पाणीपुरवठा योजनेतून पिण्याचा पाणीपुरवठा होतो. काही भागात कमी दाबाने पाणीपुरवठा होत असल्याने सिंगल फेज विद्युत पंप जोडून बहुतांशी ग्रामस्थ पाणी भरतात. शनिवारी पाणी आल्यावर विशाल हा विद्युत पंप जोडण्यास गेला.आजूबाजूचे सर्वजण पाणी भरण्याच्या गडबडीत होते.
दरम्यान विशाल यास विजेचा धक्का बसून तो बेशुद्ध झाला.काही लोकांनी आरडाओरडा केला.त्यावेळी शेजारीच रहाणाऱ्या चुलत भाऊ सुरेश दिलीप कुरणे(३७) यांनी धाव घेतली.त्यांनी त्याला तात्काळ इस्लामपूर येथे उपजिल्हा रुग्णालयात उपचारासाठी हलवले. पण त्याचा रस्त्यातच मृत्यू झाला. याप्रकरणी सुरेश यांनी इस्लामपूर पोलीस ठाण्यात वर्दी दिली.