वनविभागाने तरसाचा बंदोबस्त करण्याची मागणी
प्रतिनिधी / कडेगाव
वांगी ता.कडेगाव येथील तेलकी मळा येथे राहणाऱ्या दीपक बाबुराव दोरगे यांच्या दोन शेळ्या तरसाच्या हल्ल्यात ठार झाल्या आहेत. तर दोन शेळ्या जखमी झाल्या आहेत. ही घटना शनिवारी दि.२८ रोजी दुपारी पाचच्या दरम्यान घडली.
दीपक दोरगे यांनी घराजवळ शेळ्या बांधल्या होत्या. ते जनावरांना चारा आणण्यासाठी गेले होते. त्या दरम्यान घराजवळील ऊसामधून आलेल्या तरसाने शेळ्यांवर हल्ला केला. यावेळी शेळ्यांनी ओरडण्याचा प्रयत्न केला. मात्र तेथे जवळ कोणी नसल्याने तरसाला त्या प्रतिकार करू शकल्या नाहीत. तरसाच्या हल्ल्यात दोन शेळ्या ठार झाल्या असून दोन जखमी झाल्या आहेत. दीपक दोरगे चारा घेऊन आल्यानंतर त्यांना तरसाने शेळ्यावर हल्ला केल्याचा प्रकार दिसून आला. दीपक दोरगे यांचे जवळपास २५ हजार रूपयांचे नुकसान झाले आहे. दीपक दोरगे यांनी याबाबत वन विभागाशी संपर्क साधून तरसाने केलेल्या हल्ल्याबाबत माहिती दिली. तरसाने केलेल्या हल्ल्यामुळे वाडी वस्तीवर राहणाऱ्या शेतकऱ्यांमध्ये भीतीचे वातावरण पसरले आहे. वन विभागाने या परिसरातील तरसाचा बंदोबस्त करावा अशी मागणी होत आहे.