पुणे / प्रतिनिधी :
स्वातंत्र्यवीर सावरकर यांच्याबद्दल आक्षेपार्ह लेख प्रसिद्ध केल्याबद्दल सेवादल काँग्रेसचा निषेध करण्यासाठी शहर भाजपच्या वतीने सारसबागेजवळील सावरकर स्मारकासमोर भारतीय जनता पक्षाच्या वतीने निदर्शने करण्यात आली.
शहराध्यक्षा आमदार माधुरी मिसाळ, खासदार गिरीश बापट यांच्या नेतृत्वाखाली आयोजित केलेल्या या आंदोलनात महापौर मुरलीधर मोहोळ, उपमहापौर सरस्वती शेंडगे, स्थायी समितीचे अध्यक्ष हेमंत रासने, सभागृह नेते धीरज घाटे, माजी आमदार जगदीश मुळीक, प्रदेश चिटणीस राजेश पांडे, पश्चिम महाराष्ट्र संघटन मंत्री रवी अनासपुरे, शहर सरचिटणीस गणेश बिडकर, दीपक मिसाळ, उज्ज्वल केसकर, गणेश घोष यांचा प्रमुख सहभाग होता.
शिवसेना सत्तेसाठी स्वातंत्र्यवीरांचा अपमान सहन करतेय : गिरीश बापट
मातृभूमीची सेवा करीत सावरकरांनी हजारो देशभक्त निर्माण केले. परंतु, देशप्रेम, स्वातंत्र्यसंग्राम आणि स्वातंत्र्यवीर यांच्याबद्दल काँग्रेसला कोणतेही प्रेम राहिलेले नाही. देशात अशांतता निर्माण करण्याचा प्रयत्न कॉग्रेसकरीत आहे. शिवसेना सत्तेसाठी स्वातंत्र्यवीराचा अपमान सहन करीत आहे, ही शोकांतिका आहे. समाज हे पाहात असून योग्य वेळी त्यांना धडा शिकवेल, अशी टीका खासदार गिरीश बापट यांनी केली.