सांस्कृतिक प्रतिनिधी /फोंडा
गोवा कला अकादमी आयोजित 41 व्या सुरश्री केसरबाई केरकर संगीत संमेलनात स्थानिक, राष्ट्रीय आणि आंतरराष्ट्रीय पातळीवरील कलाकारांनी सूरस व सरस अशा गायन वादनाच्या मैफलीतून रसिकांना मनमुराद रिझविले. फोंडा येथील राजीव कलामंदिरात गेले तीन दिवस सुरु असलेल्या या संगीत संमेलनाची रविवारी यादगार सांगता झाली. पहिल्या दिवशीच्या सत्रात रितीषा वेर्णेकर यांचे गायन, दीपक क्षिरसागर यांचे सतारवादन व आरती अंकलीकर टिकेकर यांचे शास्त्रीय गायन झाले.
आरती अंकलीकर टिकेकर
पुणे येथील प्रतिभावंत गायिका आरती अंकलीकर टिकेकर या गानसरस्वती किशोरी आमोणकर यांच्या शिष्या. आपल्या मैफलीसाठी त्यांनी ‘झिंझोटी’ हा षाडव संपूर्ण वक्र राग खुबीने पेश केला. खमाज थाटातील रात्रीच्या दुसऱया प्रहरी गायिल्या जाणाऱया या रागाची वैशिष्टय़े त्यांनी श्रोत्यांसमोर विस्ताराने मांडली. हरकती, मिंडयुक्तता, सफाईदार ताना आणि रागाच्या स्थायिभावाची रितसर उकल यामुळे त्यांचे गाणे उत्तरोत्तर रंगत गेले. आपल्या अनुभवाच्या बळावर त्यांनी मैफलीचा उचित आस्वाद रसिकांना दिला. त्यांना संवादिनीवर राया कोरगावकर तर तबल्यावर मयांक बेडेकर यांनी साथसंगत केली.
धनंजय हेगडे
दुसऱया दिवशीच्या पहिल्या सत्रात धनंजय हेगडे यांनी प्रभातकालीन राग ‘रामकली’ विशिष्ट बाराकाव्यांसह पेश केला. स्वच्छ सफाईदार गळा, लालित्यपूर्ण बढत आणि सौंदर्यस्थळांचा वेध घेत त्यांनी केलेला रागविस्तार प्रभावी होता. त्यानंतर राग ‘अल्हैय्या बिलावल’ त्यांनी पेश केला. दोन्ही निषादांचा अर्थपूर्ण वापर आणि रागप्रकृतीचे उचित दर्शन घडवित त्यांनी श्रोत्यांपर्यंत आपले विचार पोहचविले. या उत्तरांगप्रधान रागाच्या वैशिष्टय़ासह तार सप्तकातील हरकतीयुक्त आणि मिंडयुक्त स्वरप्रयोगामुळे त्यांचे गाणे श्रोत्यांच्या पसंतीस उतरले. संवादिनीवर सुभाष फातर्पेकर व तबल्यावर अमर मोपकर यांची साथसंगत त्यांना लाभली.
दीपक क्षिरसागर
या संमेलनातील दीपक क्षिरसागरांचा स्लाईड गिटार वादनाचा कार्यक्रम श्रोत्यांसाठी विशेष होता. स्लाईड गिटारचा वापर बहुधा ब्लूज संगीतामध्ये होतो. परंतु हिंदुस्थानी शास्त्रीय संगीतामधील त्याचा वापर म्हणजे रसिकांसाठी ती सांगीतिक मेजवानीच होती. दीपक क्षिरसागर यांनी राग ‘गावती’ आणि राग ‘मांड’ खूप तयारीने पेश केले. बोटावरील स्लाईडच्या माध्यमातून गिटारमधून निघणाऱया भारतीय संगीताला अनुकूल आणि पोषक असलेल्या स्वरांचा श्रवणीय नाद रसिकांनी अनुभवला. धातू अथवा काचेची बोटावरील आवरणे तारांवर घासण्याची अनोखी कलाही रसिकांना पहायला मिळाली. उदय कुलकर्णी यांनी तबलासंगत केली.
शकीर खान
पुणे येथील आंतरराष्ट्रीय ख्यातीचे सितारवादक उस्ताद शाहिद परवेझ खान यांचे शिष्य व सुपूत्र शकीर खान यांनी आपल्या मैफलीची सरुवात राग ‘शुद्ध सारंग’ वाजवून केली. षाडव जातीतला कल्याण थाटातला हा अत्यंत प्रभावी राग त्यांनी तन्मयतेने पेश केला. प्रभावी आलापी, झाला, लयकारीयुक्त स्वरसंथ यामुळे त्यांच्या वादन सादरीकरणाचा उचित आनंद रसिकांना प्राप्त झाला. त्यानंतर मिश्रखमाजची रचना पेश करुन त्यांनी आपली मैफल आटोपती घेतली. त्यांना तबल्यावर ओजस अधीया यांनी साथ केली.
सोनीक वेलींगकर
गोव्यातील बासरीवादक सोनीक वेलींगकर यांनी या समारोहात बासरीवादन सादर केले. त्यांनी राग ‘गावती’ विस्ताराने मांडला. सुसंगत स्वरसंगती आणि शिस्तबद्ध मांडणी यामुळे त्यांच्या बासरीवादनाचा कार्यक्रम रंगला. त्यांना तबल्यावर हृषिकेश फडते यांनी साथसंगत केली.
प्रशांत आणि निशांत मलीक बंधू
धृपद गायकी परंपरेतील मलीक बंधूंनी धृपद गायनाच्या मैफलीसाठी राग ‘श्री’ आणि राग ‘चरुकेशी’ निवडला. संथ आलापीने त्यांनी आपल्या बंदीशीची मांडणी केली. उत्तम स्वरलगाव, विशिष्ट मुरकी, फिरत, तान या प्रकारांची उत्तम आळवणी दोन्ही गायकांनी केली. अस्थाई, अंतरा, संचारी आणि अभोगी या चारही प्रकारांचे उचित दर्शन त्यांनी धृपद गायनातून घडविले. त्याला जोडूनच दुप्पट, तिप्पट, चौपट गाऊन पुन्हा मूळ समेवर, मूळ लयीत येण्याची क्रियाही त्यांनी शैलीदारपणे पेश केली. धृपद गायकीचा उत्तम नमूना त्यांनी रसिकांसमोर ठेवला. त्यांची मैफल रंगतदार झाली. मृणाल उपाध्याय यांनी त्यांना पखवाजवर साथ केली तर संवादिनीवर गुरुप्रसाद गांधी होते.
पं. योगेश सम्सी
पं. योगेश साम्सी आणि त्यांचे शिष्यद्वय स्वप्नील भिसे आणि चंद्रशेखर गांधी या त्रयींनी तबलावादनाची प्रयोगशील मैफल सादर करुन येथील तालवादनातील जाणकार आणि विद्यार्थ्यांना आनंदाची अनुभूती दिली. मैफलीमध्ये त्यांनी ताल ‘त्रिताल’ पेश केला. घरंदाज कायदे, लयकारीयुक्त पेशकार, रेळे, तिनतालामधील चक्रधार व विविध बंदीशी त्यांनी सफाईने पेश केल्या. त्यांना सुधा उत्तम यांनी नगमा साथ दिली. तबलावादनाच्या कार्यक्रमाला रसिकांचा उस्त्फुर्त प्रतिसाद लाभला.
संगीता कट्टी कुलकर्णी
कर्नाटकमधील पार्श्वगायिका, शास्त्रीय संगीत गायिका व संगीतकार म्हणून ज्ञात असलेल्या संगीता कट्टी कुलकर्णी यांनी राग ‘यमन’ सादर केला. भरदार स्वर, रागोपयुक्त स्वरलगाव, सुसंगत आलाप, स्वरमाधुर्य आणि गाणे खुलविण्याची हातोटी यामुळे परिपूर्ण आणि सर्वांगी मैफल त्यांनी सादर केली. त्यानंतर राग ‘मालकंस’ त्यांनी गायिला. आपल्या गाण्याचा शेवट ‘बोलावा विठ्ठल’ ही संत तुकाराम महाराजांची भक्तीरचना खास रसिकाग्रहास्तव पेश करुन त्यांनी आपली मैफल श्रवणीय बनविली. त्यांना संवादिनीवर दत्तराज सुर्लकर तर तबल्यावर उदय कुलकर्णी यांनी साथसंगत केली.