ऑनलाईन टीम/तरुण भारत
बुली बाई अॅप प्रकरणानंतर आता सुल्ली डील अॅप प्रकरणात दिल्ली पोलिसांनी मोठी कारवाई केली आहे. सुल्ली डील अॅप प्रकरणात मुख्य आरोपीला अटक करण्यात आल्याची माहिती समोर आली आहे. दिल्ली पोलिसांनी धडक कारवाई करत मध्य प्रदेशच्या इंदौरमधून सुल्ली डील अॅपच्या मुख्य आरोपीला अटक केली आहे. या आरोपीचं नाव ओमकेश्वर ठाकुर असं आहे. तसेच तो BCA चा विद्यार्थी आहे. मागील वर्षातील जुलै महिन्यामध्ये सुल्ली डील अॅप तयार करण्यात आला होता. यामध्ये मुस्लिम महिलांना टार्गेट केलं जात होतं.
२५ वर्षीय आरोपी ओंकारेश्वर ठाकूरने आपण जुलै २०२१ मध्ये सुल्ली डिल्स अॅप तयार केल्याचं पोलिसांसमोर कबूल केलं आहे. सुल्ली डिल्स अॅपवर मुस्लिम महिलांच्या परवानगीविना लिलावासाठी त्यांच्या फोटोंचा वापर करण्यात आला होता. बीसीएचं शिक्षण घेतलेल्या ओंकारेश्वर ठाकूरने यामध्ये अजून काही लोक सहभागी असल्याचं म्हटलं आहे. जुलै २०२१ मध्ये दिल्ली पोलिसांनी सुल्ली डिल्स अॅप प्रकरणी पहिला गुन्हा दाखल केला होता.
दरम्यान दिल्ली पोलिसांनी ६ जानेवारीला बुली बाई अॅप तयार करणाऱ्या निरज बिष्णोईला अटक केली. सुल्ली डिल्स अॅपप्रमाणे त्यानेही मुस्लिम महिलांचे फोटो वापरत त्यांचा लिलाव करत होता.