निलेश राणे देखील येणार, पोलीस बंदोबस्तात केली वाढ
दापोली प्रतिनिधी
भाजपचे माजी खासदार किरीट सोमय्या यांच्या उद्या 26 मार्च रोजी होणाऱ्या दापोली दौऱ्याच्या पार्श्वभूमीवर दापोलीत कमालीची तणावाची स्थिती निर्माण झाली आहे. शिवाय किरीट सोमय्या यांच्या सोबत भाजपचे माजी खा. व प्रदेश सरचिटणीस डॉ. निलेश राणे हे देखील येणार असून आपल्याला कोण अडवतो तेच पहातो अशी भूमिका त्यांनी जाहीर केली आहे. दोन्ही बाजूनी ताठर भूमिका घेतल्याने आज दापोलीत काय होणार याकडे सर्वांचे लक्ष लागून राहिले आहे. यामुळे पोलिस बंदोबस्तात देखील वाढ करण्यात आली आहे.
किरीट सोमय्या यांनी ट्वीट करून पालकमंत्री अनिल परब यांच्या मुरुड येथील बेकायदा रिसोर्टबाबत 26 मार्च रोजी चलो दापोली असा नारा दिला आहे. या पार्श्वभूमीवर ते दापोली येत आहेत. किरीट सोमय्या 26 रोजी दापोलीत आले तर त्यांना अडवणार असल्याची भूमिका राष्ट्रवादीचे माजी आमदार संजय कदम यांनी जाहीर केली आहे.