प्रतिनिधी/ बेळगाव
सोमवारी बेळगाव शहर व जिल्हय़ात कोरोनाचे 11 नवे रुग्ण आढळून आले असून त्यापैकी बेळगाव तालुक्मयातील 8 जणांचा समावेश आहे. जिल्हय़ातील सक्रिय रुग्णांची संख्या 202 वर आली आहे.
आरोग्य विभागाने दिलेल्या माहितीनुसार बापट गल्ली, सदाशिवनगर, तारिहाळ, भेंडीगेरी परिसरात पॉझिटिव्ह रुग्ण आढळून आले असून बेळगाव येथील एका दंत वैद्यकीय महाविद्यालयातील चार जणांचे अहवाल पॉझिटिव्ह आले आहे. त्यानंतर घटप्रभा, लोंढा येथेही पॉझिटिव्ह रुग्ण आढळून आले आहेत.
आतापर्यंत जिल्हय़ातील 3 लाख 49 हजार 752 जणांची स्वॅब तपासणी करण्यात आली आहे. यापैकी 3 लाख 15 हजार 520 जणांचे अहवाल निगेटिव्ह आले आहे. जिल्हय़ातील एकूण बाधितांची संख्या 26 हजार 92 वर पोहोचली असून त्यापैकी 25 हजार 548 जणांनी कोरोनावर मात केली आहे. अद्याप 6 हजार 219 जणांचे अहवाल यायचे आहेत.