तरुण भारत संवाद प्रतिनिधी / कुर्डुवाडी
येथील एमआयडीसीतील सुशील इंडस्ट्रीजच्या कापसाच्या जिनिंग अॅण्ड प्रेसींग मिल ला आग लागून लाखो रूपयांचे नुकसान झाले असून सुदैवाने कोणतीही जीवितहानी झाली नाही. तीन तासाच्या अथक प्रयत्नानंतर आगीवर नियंत्रण मिळविण्यात अग्नीशामक दलाला यश आले. ही घटना मंगळवार २ फेब्रुवारी रोजी दुपारी १ वा. सुमारास घडली.
मिळालेल्या प्राथमिक माहितीनुसार कुर्डुवाडी एमआयडीसीमध्ये सुशील इंडस्ट्रीज नावाची जिनिंग,प्रेसिंग आणि आइल मिल आहे. याठिकाणी दोन नंबरच्या मशीनवर सर्की वेगळी करुन प्रेसींग करण्याचे काम चालू असताना अचानकपणे दुपारी १ वा सुमारास कापसाच्या गाठीला आग लागली.ही आग शार्टसर्कीटमुळे लागली असल्याचा प्राथमिक अंदाज उपस्थितांनी व्यक्त केला. यावेळी कर्त्यव्यावर असणारे मॅनेजर नागनाथ गात व त्यांच्या कर्मचाऱ्यांनी अग्नीशामकच्या बाटल्या फोडून आग विझविण्याचा आटोकाट प्रयत्न केला परंतू आग आटोक्यात येत नसल्याने याची माहिती कुर्डुवाडी नगरपालिकेला कळवण्यात आली. माहिती मिळताच नगरपालिकेचे अग्निशामक दलाचे घटनास्थळावर अग्निशामक हजर झाले आणि दोन तासाच्या प्रयत्नानंतर ही आग आटोक्यात आणण्यात यश आले. याबाबत कुर्डुवाडी पोलिस ठाण्यात अद्याप कोणतीही नोंद झालेली नव्हती.