वृत्तसंस्था / मुंबई
सरकारने देशातील सर्वात मोठी बँक भारतीय स्टेट बँकेत दोन नवीन व्यवस्थापकीय संचालकांच्या (एमडी) नियुक्तीकरीता मंजुरी दिली आहे. सध्या नियुक्ती होणारे अश्विनी तिवारी आणि स्वामिनाथन जानकी रमन अशी नावे असणारे दोघेही डेप्युटी मॅनेजिंग डायरेक्टर (डीएमडी) म्हणून कार्यरत आहेत.
मागील वर्षातील ऑक्टोबरमध्ये बँक बोर्ड ब्यूरो (बीबीबी) यांनी दोन एमडी पदांसाठी मुलाखत घेतली होती. सदर मुलाखतीनंतर वरील दोन नावांची घोषणा करण्यात आली आहे. कॅबिनेटची नियुक्ती समिती (एसीसी) यांनी दोघांच्या नावाला हिरवा कंदील दिला असून दोघांची नियुक्ती आगामी तीन वर्षांसाठी करण्यात आल्याची माहिती आहे. स्टेट बँकेमध्ये एकूण चार एमडी आणि एक अध्यक्ष असतात. सध्या अध्यक्ष म्हणून दिनेश खारा हे कार्यरत आहेत.
सरकारी बँकांमध्ये अध्यक्षपदच नाही
सरकारी बँकांमध्ये काही वर्षापूर्वीपासून अध्यक्ष हे पदच नाही आहे. याऐवजी एमडी आणि सीईओ ही पदे तयार करण्यात आली होती. तरीदेखील अजूनही एसबीआयमध्ये अध्यक्ष आणि एमडी ही पदे कार्यरत आहेत. अन्य सरकारी बँकांमध्ये एक एमडी, सीईओ आणि अन्य कार्यकारी संचालक पदे कार्यरत असल्याची माहिती आहे.