चालू आठवडय़ातच देशात वितरण सुरू होणार
हैदराबाद / वृत्तसंस्था
कोरोना विषाणूच्या वाढत्या प्रादूर्भावाच्या दरम्यान भारतात रशियाच्या स्पुटनिक -व्ही लसीची दुसरी खेप दाखल झाली आहे. रविवारी सकाळी विमानाने या लसी हैदराबाद येथे आल्या आहेत. आता येत्या आठवडय़ातच या लसीचे देशात विविध ठिकाणी वितरण केले जाणार आहे. यापूर्वी 1 मे रोजी स्पुटनिक-व्ही लसीची पहिली खेप देशात दाखल झाली होती.
भारतात कोरोनाच्या प्रतिबंधासाठी वापरण्यात येणारी स्पुटनिक-व्ही ही पहिलीच विदेशी लस आहे. ही लस हैदराबादच्या डॉ. रेड्डीज लॅबोरेटरिजकडून बाजारात आणली जाणार आहे. स्पुटनिक-व्ही लसीची किंमत 995 रुपये निश्चित करण्यात आली आहे. येत्या आठवडय़ातच ही लस बाजारात येण्यास सज्ज झाली आहे. पहिल्या टप्प्यातील आयातीनंतर स्पुटनिक-व्ही लसीचे लवकरच भारतात उत्पादन सुरू होणार आहे. उत्पादन सुरू झाल्यानंतर दरवर्षी जवळपास 85 कोटी व्हॅक्सिनची निर्मिती केली जाणार आहे.