वृत्तसंस्था/ सेव्हिले
युरो चषक 2020 फुटबॉल स्पर्धेत बुधवारी झालेल्या सामन्यात स्पेनने गट ई मधील शेवटच्या साखळी सामन्यात स्लोव्हाकियाचा 5-0 असा एकतर्फी धुव्वा उडवित उपउपांत्यपूर्व फेरीतील स्थानही निश्चित केले. अन्य एका सामन्यात स्वीडनने पोलंडचा 3-2 असा निसटता पराभव केला.
स्पेनतर्फे आयमेरिक लॅपोर्ट, पाब्लो साराबिया, फेरान टोरेस यांनी गोल नोंदवले तर मार्टिन डुब्रावका व जुराज कुका यांनी स्वयंगोल करून स्पेनला बोनस गोल बहाल केले. स्पेनने 5 गुणांसह गटात दुसरे स्थान मिळविले असून शेवटच्या सोळा फेरीत त्यांची लढत क्रोएशियाविरुद्ध कोपनहेगन येथे होणार आहे. सेंट पीटर्सबर्ग झालेल्या याच गटातील दुसऱया सामन्यात स्वीडनने पोलंडवर 3-2 अशी निसटती मात करीत गटात पहिले स्थान मिळविले. स्वीडनतर्फे एमिल फोर्सबर्गने दोन व व्हिक्टर क्लासेनने एक गोल नोंदवला तर पोलंडचे दोन्ही गोल रॉबर्ट लेवान्डोवस्कीने केले.