कणकवलीतील स्थिती : जिल्हय़ात आठ ठिकाणी स्वॅब सेंटर सुरू : सकाळी आलेल्या व्यक्तीला दुपारपर्यंत राहवे लागते ताटकळत : प्राथमिक आरोग्य केंद्रस्तरावर स्वॅब कलेक्शन सेंटरबाबत प्रयत्न हवेत
दिगंबर वालावलकर / कणकवली:
कोरोना व्हायरसच्या प्रादुर्भावामुळे सुरू करण्यात आलेल्या स्वॅब सेंटरच्या ठिकाणी सुविधांची वानवा आहे. सकाळी स्वॅब देण्यासाठी आलेल्या व्यक्तीला नोंदणी केल्यानंतर येथे एक ते तीन तासापर्यंत तेथील स्थितीनुसार थांबून राहवे लागते. यावेळेत पिण्याच्या पाण्यासह, बैठक व्यवस्था व अन्य कोणतीही सुविधा उपलब्ध नाही. कोरोनाचा प्रादुर्भाव वाढला, तर जेथे शक्य आहे, त्या प्राथमिक आरोग्य केंद्रात स्वॅब कलेक्शन करण्याच्यादृष्टीने आतापासूनच प्रयत्न होण्याची गरज आहे.
कोरोनाचा प्रादुर्भाव सुरू झाल्यानंतर जिल्हय़ात सुरुवातीच्या काळात सिंधुदुर्गनगरी येथे कोविड सेंटरच्या ठिकाणी स्वॅब कलेक्शन सेंटर सुरू करण्यात आले होते. मात्र, स्वॅब तपासणीसाठी जिल्हय़ाच्या ठिकाणी जाणे कठीण होत असल्याने प्रत्येक तालुक्याच्या ठिकाणी स्वॅब कलेक्शन्स सेंटर सुरू करण्यात आली. कुडाळचे स्वॅब सेंटर सिंधुदुर्गनगरी येथे करण्यात आले. त्याचा उपयोगही चांगल्या प्रमाणात झाला.
कणकवलीत वाढते रुग्ण
कणकवलीत आमदार वैभव नाईक व नंतर त्यांच्या हायरिस्क संपर्कात असलेले शिवसेना नेते संदेश पारकरही कोरोना पॉझिटिव्ह आले. त्यानंतर पॉझिटिव्ह रुग्णांच्या संख्येत वाढ होऊ लागली. कणकवलीतील एकमेव असलेल्या स्वॅब कलेक्शन सेंटरवर एकावेळी 20 व्यक्तींची मर्यादा असताना एकाच दिवशी 50 ते 75 पर्यंत व्यक्ती स्वॅब देण्यासाठी आल्याने येथे गर्दीचे प्रमाण वाढले.
काहींना लागण झाल्यानंतरही लक्षणे नाहीत!
स्वॅब कलेक्शन सेंटरवर येणारी प्रत्येक व्यक्ती ही पॉझिटिव्ह किंवा निगेटिव्ह याचा संदर्भ तपासणीशिवाय समजू शकत नाही. कोरोनाची लागण झाल्यानंतर काहींना लक्षणेच दिसत नाहीत, अशांना कणकवली-हरकुळ येथील कोविड सेंटरमध्ये ठेवण्यात आल्याची माहिती आरोग्य विभागाच्या सूत्रांनी दिली.
समूह संसर्ग रोखण्यासाठी प्रयत्न हवेत!
गणेश चतुर्थीसाठी जिल्हय़ात मोठय़ा संख्येने चाकरमानी गावात येणार आहेत. या कालावधीत स्वॅब कलेक्शन सेंटरमध्ये गर्दी होऊ लागल्यास कोरोनाचा समूह संसर्गाची भीती आहे. पण अशा पद्धतीने संसर्ग पसरल्याची घटना समोर आली नसल्याचा दावा आरोग्य विभागाच्या सूत्रांनी केला आहे. स्वॅब सेंटरला गेलेली व्यक्ती कोरोना पॉझिटिव्ह असली, तर ती तेथे अर्ध्या तासापेक्षा जास्तकाळ थांबून अन्य कुणाच्या संपर्कात आली, तर संसर्ग कसा रोखता येऊ शकतो, याबाबत साशंकता आहे. त्यामुळे कर्मचारी वर्गात वाढ करून सुरक्षिततेबाबत उपाययोजना करण्याची गरज आहे. येथे सॅनिटायझर, हॅण्डवॉश आदी सुविधाही देण्याची मागणी केली जात आहे.
अशी होते स्वॅब घेण्याची प्रक्रिया
स्वॅब कलेक्शन केंद्रावर स्वॅब देण्यासाठी येणाऱया व्यक्तींचे सुरुवातीला ऑनलाईन रजिस्ट्रेशन करण्यात येते. यावेळी त्या व्यक्तीच्या मोबाईलवर रजिस्ट्रेशन आयडीचा मेसेज येतो. त्यानंतर त्या दिवस ज्या व्यक्ती स्वॅब देण्यासाठी आलेल्या असतात, त्या सर्वांचे अगोदर रजिस्ट्रेशन करून नंतर स्वॅब घेण्यास सुरुवात करण्यात येते. या स्वॅब घेणाऱया कर्मचाऱयांना पीपीई किट व सुरक्षिततेच्यादृष्टीने काळजी घेणाऱया साधनांचा वापर करावा लागतो. या सर्व कालावधीचा विचार केला, तर साधारण रजिस्ट्रेशन झाल्यापासून एक ते तीन तासापर्यंत या भागात या सर्व व्यक्ती एकत्र येतात. यावेळी सोशल डिस्टन्सिंग पाळले जातेच, असे नाही. त्यामुळे यातूनच समूह संसर्गाचा धोका जास्त होऊ शकतो. त्यामुळे येथे काळजी घेण्याची गरज आहे.
पीएचसीस्तरावर चाचपणी करावी
स्वॅब सेंटरवर आरोग्य कर्मचाऱयांनाही सुविधा मिळण्याची गरज आहे. स्वॅब घेतल्यानंतर उर्वरित कागदोपत्री कामकाज हे ऑनलाईन पद्धतीने होत असल्याने त्याबाबत सुविधा येथे पुरविण्याची गरज आहे. भविष्यातील स्थितीचा विचार करून प्राथमिक आरोग्य केंद्रस्तरावरील कर्मचाऱयांना स्वॅब कलेक्शनबाबत प्रशिक्षण आताच देण्याबाबत चाचपणी करण्याची गरज आहे. एकाचवेळी जर पॉझिटिव्ह रुग्णाच्या संपर्कातील संख्या वाढली, तर नंतर धावपळ करण्यापेक्षा आताच त्याबाबत उपाययोजना सुरू करण्याची गरज आहे.
गावात स्वॅब युनिट नेता येते!
नाईक व पारकर यांच्या हायरिस्क संपर्कात असलेल्या व्यक्तींमुळे कणकवली स्वॅब केंद्रावर गेल्या चार दिवसांत गर्दी वाढली. अन्यथा पॉझिटिव्ह रुग्णाच्या संपर्कात आलेल्यांनाच आरोग्य विभागाच्या सर्व्हे यादीनुसार स्वॅब सेंटरमध्ये बोलविण्यात येते. त्यामुळे इतरवेळी येथे गर्दीचे प्रमाण जास्त नसते. एखाद्या गावात जर पॉझिटिव्ह रुग्णाच्या संपर्कात जास्त व्यक्ती आल्या, तर स्वॅब कलेक्शन सेंटरचे युनिट त्या गावात नेता येते, असे आरोग्य विभागाकडून सांगण्यात आले.