वार्ताहर / कुंभोज
मुस्लिम धर्मीयांचा पवित्र हज यात्रेसाठी फॉर्म भरताना इन्कम टॅक्स रिटर्न आवश्यक राहणार ही अट रद्द करण्यात यावी, अशी मागणी कुंभोज ग्रामपंचायतीचे उपसरपंच जहांगीर हजरत यांच्यावतीने शासन दरबारी निवेदनाद्वारे करण्यात आली आहे.
राज्यातील अल्पसंख्यांक मंत्री नवाब मलिक व हज कमिटी अध्यक्ष आणि कार्यकारी मुख्य अधिकारी यांनाही निवेदन देणार असल्याचे त्यांनी म्हटले आहे. पवित्र हज यात्रेसाठी काही मुस्लिम बांधव वर्षानुवर्षे रक्कम जमा करतात, पूर्ण रक्कम जमा झाल्यावर पवित्र हज यात्रेसाठी फॉर्म भरतात तसेच काही मुस्लीम बांधव अनेक गरीबांना हज यात्रेसाठी पाठवतात, वरील सर्व मुद्द्यांचा विचार करून सदर गोष्टींवर लावण्यात आलेले आयटी रिटर्नची जाचक अट रद्द करण्यात यावी, अशी मागणी यावेळी कुंभोज उपसरपंच व मुस्लिम समाजाचे प्रतिनिधी जहांगीर हझरत यांच्यावतीने शासनाकडे करण्यात आली आहे.