ग्रामस्थांत कोरोना व्हायरसची धास्ती, नोट परीक्षणासाठी पोलिसांनी घेतली ताब्यात
खानापूर /वार्ताहर
जांबोटीजवळील हबनहट्टी ते स्वयंभू हनुमान मंदिराकडे जाणाऱया रस्त्यावर एक पाचशे रुपयांची नोट सापडल्याने ग्रामस्थांत एकच खळबळ उडाली आहे. गावापासून काही अंतरावर रस्त्याच्या मधोमध सदर पाचशे रुपयांची नोट पडलेली बैलूर येथील रस्त्यावरून येणाऱया दुचाकीस्वारांना दिसली. सदर बाब गावात कळताच काहींनी गर्दी केली. मात्र त्या नोटेला कोणीही हात लावला नाही. तातडीने जांबोटी आऊट पोस्टमधील पोलिसांना पाचारण करण्यात आले. घटनास्थळी पोलीस निरीक्षक सुरेश सिंगी यांनी भेट देऊन पाहणी केली. सदर नोट त्यांनी काळजीपूर्वक एका प्लास्टिक पिशवीमध्ये घालून ती खानापूरला तपासणीसाठी पाठविली आहे.
एकीकडे कोरोना व्हायरसच्या संसर्गासाठी रस्त्यावर नोटा टाकून त्याअंतर्गत कोरोनाचा प्रादुर्भाव वाढवण्याचा प्रयत्न केला जात असल्याची धास्ती समाजामध्ये निर्माण झाली आहे. त्यामुळे रस्त्यावर पडलेल्या अथवा इकडे-तिकडे विखुरलेल्या नोटा कोणीही सहजपणे हातात धरू नये, असे व्हॉट्सऍपद्वारे अनेक व्हिडिओ व्हायरल होताना दिसत आहेत. त्यामुळे अशा पडलेल्या नोटा घेताना गांभीर्य राखण्यासाठी नागरिकही सतर्क झाले आहेत. हब्बनहट्टी रस्त्यावर पडलेली सदर पाचशे रुपयांची नोट नेमकी कोणाच्या खिशातून पडली असावी का, की कोणी जाणीवपूर्वक समाजात भीती निर्माण करण्यासाठी टाकली असावी, अथवा कोरोना व्हायरससंदर्भातच या नोटेचा संबंध असावा, याबाबत अनेक तर्कवितर्क केले जात आहेत.