वार्ताहर / शिये
शिये जिल्हा परिषद मतदार संघात उभारण्यात आलेल्या हायमास्ट पथदिव्यांसाठी महावितरणने वीज पुरवठा न केल्याने दिव्याखाली अंधार असल्याची परिस्थिती निर्माण झाली आहे. महावितरण त्वरित विज न जोडल्यास उपोषण करणार असल्याचा इशारा जिल्हा परिषद सदस्या मनीषा कुरणे यांनी दिला आहे.
शिवसेनेच्या जिल्हा परिषद सदस्या मनीषा कुरणे यांनी आपल्या फंडातून दलित वस्ती सुधार योजनेतून शियेत ३ , सादळे – मादळेत २, भुये व निगवे दुमाला येथे प्रत्येकी १ असे ७ हायमास्ट पथदिवे उभे केले आहेत. पथदिवा उभारणीसाठी प्रत्येकी सव्वालाख प्रमाणे १० लाख रुपये खर्च आला आहे. काम पुर्ण होऊन दोन महिने झाले. कुरणे यांनी वीज जोडणीबाबत महावितरण कार्यालयास पत्रव्यवहार केला आहे.
तरीही ग्रामपंचायतीचे वीजबिल थकीत असल्याचे कारण पुढे करत महावितरणने वीज जोडणीसाठी नकार दिला असल्याचे कुरणे यांनी सांगितले. त्यामुळे सात दिवसांत वीज जोडणी न केल्यास उपोषण करणार असल्याचा इशारा जिल्हा परिषद सदस्या मनीषा कुरणे व ग्रामपंचायत सदस्य सतीश कुरणे यांनी दिला आहे.