टेक्निकल अपग्रेडेशन होणार- आरबीआयची माहिती
नवी दिल्ली / वृत्तसंस्था
येत्या रविवारी म्हणजे 18 एप्रिल रोजी आरटीजीएस सेवा जवळपास 14 तासासाठी तात्पुरती बंद राहणार आहे. 18 एप्रिलला मध्यरात्री 12 ते दुपारी 2 या वेळेत टेक्निकल अपग्रेडेशन (तांत्रिक सुधारणा) करण्यासाठी ही सेवा तात्पुरती खंडित केली जाणार असल्याची माहिती रिझर्व्ह बँक ऑफ इंडियाने दिली आहे. साहजिकच ग्राहकांना ऑनलाईन पैसे हस्तांतरित करण्यात अडचणी येऊ शकतात. यावेळी ग्राहक आरटीजीएस मनी ट्रान्स्फर सेवेद्वारे पैसे पाठविण्यास किंवा कोणताही ऑनलाईन व्यवहार करू शकणार नाहीत. रविवारी आरटीजीएस मनी ट्रान्सफर सेवा बंद ठेवण्यात येणार असली तरी ग्राहक ‘एनईएफटी’मार्फत ऑनलाईन व्यवहार करू शकतील. त्यामुळे लोकांना ऑनलाईन पैसे हस्तांतरित करण्यात किंवा डिजिटल पेमेंट करण्यात फारसा त्रास होणार नाही.
आरटीजीएस प्रणालीची गती वाढविण्यासाठी तांत्रिक अपग्रेडिंग करण्याचा निर्णय घेण्यात आला आहे. या अपग्रेडिंगनंतर ग्राहकांना अधिक सुलभपणे आणि वेगाने या सेवेचा वापर करण्याचा लाभ ग्राहकांना मिळेल, असे आरबीआयने आपल्या निवेदनात म्हटले आहे. आरबीआयने गेल्या आठवडय़ात देशातील एनबीएफसी, फिन्टेक स्टार्टअप्स आणि पेमेंट बँकांना आरटीजीएस आणि एनईएफटीद्वारे निधी हस्तांतरित करण्याची परवानगी दिली होती. आरबीआयच्या या निर्णयामुळे बँकांव्यतिरिक्त अन्य वित्तीय संस्थादेखील आरटीजीएस आणि एनईएफटीमार्फत व्यवहार करण्याची सुविधा देऊ शकतील.