ऑनलाईन टीम / तरुण भारत :
पंढरपूरला देवदर्शनासाठी निघालेली ट्रॅव्हल्स चालकाच्या निष्काळजीपणामुळे पलटी झाली. या अपघातात ट्रॅव्हल्समधील 28 भाविक जखमी झाले असून, एका भाविकाचा दुर्दैवी मृत्यू झाला. सोलापूरच्या मंगळवेढा तालुक्यातील येड्राव फाटा येथे आज सकाळी हा अपघात झाला.
मिळालेल्या माहितीनुसार, मध्यप्रदेश आणि उत्तरप्रदेशातील 38 भाविकांना घेऊन खासगी ट्रॅव्हल्स पंढरपूरला निघाली होती. सकाळी सहा वाजण्याच्या सुमारास मंगळवेढा तालुक्यातील येड्राव फाट्यावरून ही ट्रॅव्हल्स जात होती. यावेळी चालक मोबाईलवर बोलत होता त्यामुळे भरधाव वेगतील ट्रॅव्हल्स अनियंत्रित होऊन पलटी झाली. अपघाताची माहिती मिळताच स्थानिकांनी बचावकार्य हाती घेतले. जखमींना तात्काळ बाहेर काढून जवळच्या ग्रामीण रुग्णालयात दाखल केले. दरम्यान, या अपघातात ट्रॅव्हल्समधील 28 भाविक जखमी झाले आहेत. एकाचा मृत्यू झाला असून, 8 जणांची प्रकृती गंभीर आहे.