65 प्रवाशांनी भरलेली बस ट्रकला धडकली
रांची / वृत्तसंस्था
झारखंडमधील हजारीबाग येथे पर्यटक बस आणि ट्रक यांच्यात झालेल्या धडकेत चार जणांचा मृत्यू झाला. या अपघातात 12 हून अधिक प्रवासी जखमी झाले आहेत. कटकमसांडी हजारीबाग रस्त्यावर शनिवारी मध्यरात्री दीडच्या सुमारास हा अपघात झाला. दोन्ही वाहनांची समोरासमोर धडक झाली. अपघातानंतर दोन्ही वाहने रस्त्यावर पलटी झाली. जखमींना रुग्णवाहिकेच्या मदतीने रुग्णालयात नेण्यात आले असून सर्वांवर उपचार सुरू आहेत. बसमधील प्रवासी गयाहून ओडिशाला जात असताना हा भीषण अपघात घडल्याची माहिती पोलीस सूत्रांनी दिली. या अपघातप्रकरणी वाहन चालकांवर गुन्हे नोंदवण्यात आले असून अधिक तपास केला जात आहे.