पुणे / प्रतिनिधी :
पुण्यातील लक्ष्मी रस्त्यावरील एका कपडे विक्री करणाऱ्या व्यावसायिकाला धमकावून खंडणी उकळणाऱ्या एकाला अटक करण्यात आली असून, याप्रकरणी साथीदारांविरोधातही गुन्हा दाखल करण्यात आला आहे.
रवींद्र पीरप्पा कांबळे (वय ३६, रा. बुधवार पेठ, पुणे) असे अटक करण्यात आलेल्याचे नाव आहे. या प्रकरणी कांबळेचे साथीदार आकाश कासट, जमीर कदम यांच्यासह साथीदारांविरोधात गुन्हा दाखल करण्यात आला आहे. याबाबत २८ वर्षीय व्यावसायिकाने फिर्याद दिली आहे. फिर्यादीचा कपडे विक्रीचा व्यवसाय आहे. त्याने आरोपींकडून सात लाख रुपये व्याजाने घेतले होते. त्या बदल्यात व्यावसायिकाने आरोपींना एकूण १३ लाख ६२ हजार रुपये परत केले होते. त्यानंतर आरोपींनी फिर्यादीकडे १३ लाख ५० हजारांची मागणी केली. पैसे न दिल्यास व्यावसायिक आणि त्याच्या कुटुंबीयांना जीवे मारण्याची धमकी दिली. व्यावसायिकाने याबाबत खंडणी विरोधी पथक एकचे पोलीस निरीक्षक अजय वाघमारे यांच्याकडे तक्रार अर्ज दिला.त्यानंतर खंडणी विरोधी पथकाने कारवाई करून कांबळे याला अटक केली असून, त्याच्याबरोबर असलेल्या साथीदारांचा शोध घेण्यात येत आहे.
अधिक वाचा : शिवसेनेचे अधिकृत चिन्ह एकनाथ शिंदेंनाच मिळणार; राणेंची भविष्यवाणी