सुदैवाने जीवितहानी टळली, घराची हानी
कुंभारजुवे/प्रतिनिधी
करमळी सकयलेभाट येथील मेघनाथ आणि दत्ता मुरगांवकर यांच्या घरांवर रविवारी पहाटे पिपळाचे झाड कोसळल्याने मोठे नुकसान झाले. सुदैवाने या घटनेत कोणीही जखमी झाले नाही.
कुंभारजुवेचे आमदार राजेश फळदेसाई यांनी परिस्थितीची पाहणी करुन नुकसानीचा आढावा घेतला. जुने गोवे अग्निशामक दलाचे आणि आपत्कालीन विभागाचे कर्मचारीही घटनास्थळी दाखल झाल. त्यांनी स्थानिकांच्या मदतीने छतावर पडलेल्या पिंपळाच्या मोठय़ा फांद्या साफ करण्यास सुरुवात केली.
या पडलेल्या झाडाच्या मोठय़ा फांद्यांमुळे घराच्या छताचे नुकसान झाले. अनेक मंगलोर कौले फुटली आणि वासेही मोडले. झाड विद्युत तारांवरती पडल्याने तारा तुटल्या. त्यामुळे परिसरातील वीजपुरवठा खंडित झाला. आमदार फळदेसाई यांनी घरमालकांना दुरुस्तीसाठी आवश्यक ती सर्व मदत करण्याचे आश्वासन दिले आहे.
जॉन बोर्जेस यांच्यासह करमळी पंचायतीचे माजी सरपंच कुष्टा सालेलकर व अन्य याप्रसंगी उपस्थित होते. गेल्या काही दिवसांपासून राज्यात मुसळधार पाऊस पडत असून, झाडे उन्मळून पडण्याच्या अनेक घटना घडल्या आहेत.