अपघाताची दृष्ये सीसीटीव्हीत कैद
प्रतिनिधी /बेळगाव
भरधाव कारने रस्त्याशेजारी उभी करण्यात आलेली कार व दुचाकीला ठोकरल्याची घटना महात्मा फुले रोड परिसरात घडली असून अपघाताची दृष्ये सीसीटीव्ही कॅमेऱयात कैद झाली आहेत.
लाल रंगाची एक कार सुसाट वेगाने येते. वेगामुळे कार भररस्त्यावर आडवी होते. त्यानंतर रस्त्याशेजारी उभी करण्यात आलेली कार व दुचाकीला धडक देते. कारच्या ठोकरीमुळे पांढरी कार चालकाविनाच पुढे सरकू लागते. त्यानंतर त्या कारला अडविण्यासाठी नागरिक त्या दिशेने धाव घेतात.
यासंबंधी वाहतूक दक्षिण विभाग पोलीस स्थानकाशी संपर्क साधला असता अपघात घडल्याची माहिती मिळाली. सीसीटीव्ही फुटेजवरून या अपघाताची माहिती सामोरी आली आहे. मात्र सुदैवाने कोणालाच इजा पोहोचली नाही. यासंबंधी एफआयआर दाखल झाला नसल्याचे पोलिसांनी सांगितले.