कोल्हापूर : चित्रपटाचे शूटिंग संपल्यानंतर फोटोग्राफी करताना किल्ले पन्हाळगडावरील सज्जाकोटीवरून एक तरुण दरीत पडल्याची घटना रात्री 9.15 च्या सुमारास घडली. नागेश खोबरे (वय 19 रा. कराड) असे दरीत पडलेल्या तरुणाचे नाव असून, तो गंभीर जखमी आहे. त्याच्यावर सध्या रुग्णालयात उपचार सुरू आहेत.
दिग्दर्शक महेश मांजरेकर यांच्या वेडात मराठे वीर दौडले सात या चित्रपटाचे सध्या किल्ले पन्हाळगडावर शूटिंग सुरू आहे. या शूटिंगसाठी नागेश आला होता. शूटिंग संपल्यानंतर नागेश हा मावळ्याच्या वेशात असल्याने तो फोटोग्राफीसाठी सज्जाकोटीच्या तटबंदीवर चढला. त्यावेळी पाय घसरून तो दरीत पडला. सहकाऱ्यांनी तात्काळ त्याला बाहेर काढून रुग्णालयात दाखल केले. त्याची प्रकृती गंभीर असून, उपचार सुरू आहेत.