सचिवाने पोलीस अधिकाऱयाकडे मागितली लाच
वृत्तसंस्था /चंदीगड
पंजाबच्या डेराबस्सीचे आम आदमी पक्षाचे आमदार कुलजीत रंधावा हे वादात सापडले आहेत. आमदाराचे सचिव नितिन लूथरा यांनी बलटाना पोलीस स्थानक प्रमुखाकडून 1 लाख रुपयांची लाच मागितली. ही लाच न दिल्याने संबंधित पोलीस अधिकाऱयाची बदली करण्यात आली आहे. यासंबंधीचे एक कॉल रेकॉर्डिंग व्हायरल होत आहे. यासंबंधीची तक्रार आम आदमी पक्षाचे नेते विक्रम धवन यांनीच केली आहे. तर आमदार रंधावा यांनी स्वतःवरील आरोप फेटाळले आहेत. याप्रकरणी आता सर्वांच्या नजरा मुख्यमंत्री भगवंत मान यांच्यावर केंद्रीत झाल्या आहेत. आरोग्य विभागाच्या कामांसाठी 1 टक्के कमिशन मागणारे आरोग्यमंत्री डॉ. विजय सिंगला यांना त्यांनी पदावरून हटविले होते. तसेच संबंधित नेत्याच्या विरोधात गुन्हा नोंदवत त्याला अटकही करण्यात आली होती. आमदाराच्या विरोधात मान अशाचप्रकारची कारवाई करणार का असा प्रश्न आता उपस्थित होत आहे.