20 हजार रुपयांची लाच घेताना कारवाई
प्रतिनिधी /बेळगाव
अनगोळ येथील एका बेरोजगार युवकाकडून 20 हजार रुपयांची लाच घेताना कृषी खात्याच्या अधिकाऱयाला रंगेहाथ पकडले आहे. बुधवारी एसीबीच्या अधिकाऱयांनी ही कारवाई केली. या कारवाईनंतर घर व कार्यालयात केलेल्या तपासणीत 3 लाख 98 हजार रुपये जप्त केले आहेत.
एसीबीचे पोलीस अधीक्षक बी. एस. नेमगौडा यांच्या मार्गदर्शनाखाली पोलीस उपअधीक्षक जे. एम. करुणाकर शेट्टी, पोलीस निरीक्षक ए. एस. गुदीगोप्प, निरंजन पाटील व त्यांच्या सहकाऱयांनी ही कारवाई केली. एसीबीच्या कारवाईने सरकारी अधिकाऱयांत खळबळ माजली आहे.
बाबले गल्ली, अनगोळ येथील मोनेश्वर आण्णाप्पा कम्मार यांनी दिलेल्या फिर्यादीवरून कृषी खात्याच्या सहसंचालक कार्यालयातील अधिकारी योगेश फकिरेश अगडी यांना 20 हजार रुपयांची लाच घेताना अटक झाली आहे. एसीबीने एका पत्रकाद्वारे ही माहिती दिली आहे.
मोनेश्वर हे बेरोजगार आहेत. त्यांनी सिटी कंपोस्ट मार्केटिंग (स्टेट मार्केटर्स लायसेन्स)साठी ऑनलाईन अर्ज दाखल केला होता. या अर्जाची पडताळणी करून अहवाल देण्यासाठी कृषी खात्याचे योगेश अडगी यांनी 30 हजार रुपये मागितले होते. 10 हजार रुपये आधीच स्वीकारले होते. उर्वरित 20 हजार रुपये घेताना बुधवारी त्यांना अटक झाली. त्यानंतर एसीबीच्या अधिकाऱयांनी त्यांच्या कार्यालयात 44 हजार व घरात 3 लाख 54 हजार असे 3 लाख 98 हजार रुपये जप्त केले आहेत.