ऑनलाईन टीम / पुणे :
थोर समाजसुधारक प्रबोधनकार ठाकरे यांची कन्या आणि शिवसेनाप्रमुख दिवंगत बाळासाहेब ठाकरे यांच्या लहान भगिनी संजीवनी करंदीकर (Sanjeevani Karandikar) यांचे आज पुण्यात निधन झाले. त्या 84 वर्षांच्या होत्या. प्रकृती अस्वास्थ्यामुळे करंदीकर यांना काल सायंकाळी दीनानाथ रुग्णालयात दाखल करण्यात आले होते. उपचारादरम्यान आज सकाळी त्यांची प्राणज्योत मालवली. त्यांच्यावर सायंकाळी पाच वाजता वैकुंठ स्मशानभूमीत अंत्यसंस्कार होणार आहेत.
मुख्यमंत्री उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांच्या त्या आत्या तर चित्रपट सेनेच्या पदाधिकारी कीर्ती फाटक यांच्या त्या मातोश्री होत. करंदीकर यांनी आंतरजातीय विवाह केला होता. रिझर्व्ह बँक ऑफ इंडियामध्ये 38 वर्षे त्यांनी मशीन सेक्शन अधिकारी म्हणून काम केले होते. करंदीकर यांच्या निधानामुळे ठाकरे कुटुंबावर शोककळा पसरली आहे.