अमेरिकेत शोचे आयोजन ः दोन वर्षे बंद होता शो ः विविध कंपन्यांची भन्नाट उत्पादने
लॉस वेगास
अमेरिकेतील लास वेगास येथे 5 जानेवारीपासून तंत्रज्ञानाचा सर्वात मोठा ‘फेअर’ कन्झ्युमर इलेक्ट्रॉनिक्स शो (सीईएस) सुरू झाला आहे. कोरोनामुळे गेल्या 2 वर्षांपासून हा कार्यक्रम झाला नव्हता. यावेळी पूर्ण क्षमतेने याचे आयोजन करण्यात आले आहे. यात जगभरातील तंत्रज्ञान प्रेमी, टेक क्षेत्रातील अभ्यासक आणि तंत्रज्ञान कंपन्या मोठय़ा प्रमाणात सहभागी झाल्या आहेत. काही संभाव्य गॅजेट्सबद्दलची माहिती आपण पाहणार आहोत.
5 ते 8 जानेवारी दरम्यान आयोजन
सीईएस शो 2023 लास वेगास कन्व्हेन्शन सेंटर येथे 5 ते 8 जानेवारी दरम्यान भरला आहे. या शोमध्ये ऍमेझॉन, सॅमसंग आणि मेटासह अनेक टेक दिग्गजांकडून नवीन उत्पादने सादर करण्यात आली आहेत. या कार्यक्रमाचे आयोजक कंझ्युमर टेक्नॉलॉजी असोसिएशन (सीटीए) च्या मते सीईएस हा जगातील सर्वात प्रभावशाली टेक इव्हेंट आहे.
2800 हून अधिक कंपन्या
या शोमध्ये सहभागी होण्यासाठी 2800 हून अधिक कंपन्यांनी साइन अप केले आहे. यामध्ये सॅमसंग, ऍमेझॉन, गुगल, एलजी, मायक्रोसॉफ्ट, पॅनासोनिक, डेल, असूस यासारख्या मोठय़ा कंपन्या या कार्यक्रमात सहभागी होणार आहेत. गुरुवारी पहिल्या दिवशीच्या सुरुवातीस अनेक कंपन्यांनी आपल्या उत्पादनांची झलक टीझरद्वारे दाखवली आहे.
सोनीची नवी योजना
सोनी कंपनीने इलेक्ट्रिक वाहनांच्या निर्मितीचा विचार केला असून 2025 पर्यंत इलेक्ट्रिक वाहने विकणार असल्याचे संकेत दिले आहेत. सोनीचे प्लेस्टेशन व्हीआर2 देखील फेब्रुवारीमध्ये रिलीज होणार आहे. हा एक रिऍलिटी हेडसेट आहे, जो प्लेस्टेशन 5 सह कार्य करणार असल्याचे स्पष्ट केले आहे.
डेल, एचपीसह लेनोव्हाचे गेमवर लक्ष्य
रिपोर्ट्सनुसार, डेल, एचपी आणि लेनोवो गेमिंगवर आधारीत नवीन 2-इन-1एस मॉनिटर्स सादर करणार आहेत. यामध्ये ऍमेझॉनने सीईएस-2023 साठी वेबपेज तयार केले आहे, परंतु अद्याप उत्पादनांबद्दल जास्त माहिती दिलेली नाही.
एक लाख जण देतात भेट
हा जगातील सर्वात मोठा तंत्रज्ञान ‘मेळावा’ म्हणून ओळखला जातो. याची सुरुवात 1967 साली झाली. सुमारे 250 कंपन्या आणि 17500 लोकांनी यात सहभाग घेतला. सुरुवातीला ते न्यूयॉर्कमध्ये आयोजित केले गेले होते, नंतर ते लास वेगासमध्ये कायमचे आयोजित केले गेले. आता दरवर्षी सुमारे 1 लाख लोक पोहोचतात.