वृत्तसंस्था/ कॅनबरा
अमेरिकेपासून ऑस्ट्रेलियापर्यंत आणि जपानपासून आफ्रिकेतील सागरी भागांपर्यंत ड्रगनच्या कारवायांमुळे अनेक देश त्रस्त आहेत. याचदरम्यान चीन ऑस्ट्रेलियात हेरगिरी करत असल्याचा दावा तेथील संरक्षणमंत्री पीटर डटन यांनी केला आहे. चिनी टेहळणी नौका एक आठवडय़ापासून ऑस्ट्रेलियाच्या पश्चिम किनाऱयावर नजर ठेवून असल्याचे त्यांनी म्हटले आहे.
चिनी टेहळणी नौका सैन्य आणि गोपनीय तळांनजीक दिसून आल्याचे डटन म्हणाले. 21 मे रोजी होणाऱया निवडणुकीच्या पार्श्वभूमीवर त्यांचे हे विधान महत्त्वाचे ठरते. पंतप्रधान स्कॉट मॉरिसन हे सुरक्षेचा मुद्दा उचलून धरत जाहीर सभांमध्ये चीनच्या विरोधात वातावरणनिर्मिती करत आहेत. मुख्य विरोधी पक्ष लेबर पार्टीला चीन आर्थिक मदत करत असल्याचा आरोप मॉरिसन यांच्या लिबरल पार्टीने केला आहे. चीनसोबतचे ऑस्ट्रेलियाचे संबंध तेथील निवडणुकीत महत्त्वाचा मुद्दा ठरला आहे.
2019 आणि 2021 मध्ये अशाचप्रकारे एक चिनी नौका ऑस्ट्रेलियाच्या सैन्य मोहिमेवर नजर ठेवण्यासाठी दाखल झली होती. अशाप्रकारची टेहळणी आता मोठय़ा प्रमाणावर होऊ लागली आहे. विशेषकरून आशिया-प्रशांत आणि हिंद-प्रशांत क्षेत्रात अशाप्रकारची हेरगिरी वाढल्याने सामरिक शत्रुत्व देखील वाढत आहे.