रत्नागिरी/प्रतिनिधी
चिपळूण तालुक्यातील अलोरे चेंबरी या ठिकाणी विवाहित जोडप्याने जेवणातून विष घेऊन आत्महत्या केल्याचा धक्कादायक प्रकार घडला आहे.प्रेम विवाह केलेल्या जोडप्याने दुपारी कामावरुन घरी परत आल्यानंतर जेवणातून विष घेऊन आत्महत्या केल्याची घटना घडली आहे.संजय सदा निकम आणि सोनाली संजय निकम अशी आत्महत्या करणाऱ्या पती-पत्नीचे नाव आहे. याप्रकरणी शिरगाव पोलीस ठाण्यात आत्महत्येची नोंद करण्यात आली आहे. दरम्यान, या जोडप्याने आत्महत्या का केली याबाबत अद्याप माहिती मिळू शकली नाही. शिरगाव पोलीस याबाबत अधिक तपास करत आहेत.
संजय निकम याच्या पहिल्या पत्नीचा मृत्यू झाल्यानंतर त्याने सोनाली हिच्याशी प्रेमविवाह केला होता.दोघेही मोलमजुरी करुन आपला उदरनिर्वाह चालवत होते. काल दुपारी नेहमीप्रमाणे दोघेही मजुरीचे काम करून आपल्या घरी आले होते.घरी आल्यानंतर जेवणातून विष घेऊन ते झोपी गेले होते, असा अंदाज पोलिसांनी वर्तवला आहे. सायंकाळी घरामधील बकऱ्या चरायला घेऊन गेलेली आजी घरी परतल्यानंतर त्यांनी या दोघा नवरा-बायकोला झोपेतून उठवण्याचा प्रयत्न केला.परंतु ते कोणताच प्रतिसाद देत नसल्याने त्यांनी आजूबाजूच्या लोकांना बोलावलं.यावेळी पती-पत्नी मयत असल्याचं कळलं.यानंतर पोलिसांना घटनेची माहिती देण्यात आली. चिपळूण पोलीस या घटनेचा अधिक तपास करत आहेत.