तरुण भारत

मिरजेत 20 हजारांच्या बदल्यात साडेचार लाखांची मागणी; महिला सावकारांवर गुन्हा

प्रतिनिधी/मिरज

तालुक्यातील बेळंकी येथे खासगी सावकारांच्या तगाद्याला कंटाळून एकाच घरातील तिघांनी आत्महत्या केल्याची घटना ताजी असतानाच मिरज शहरात खासगी सावकारीचे दुसरे प्रकरण उजेडात आले आहे. कर्जाऊ घेतलेल्या 20 हजार रुपयांवर 30 टक्के व्याजाची आकारणी करुन त्या बदल्यात साडेचार लाख रुपयांची मागणी करून कोरे स्टँप आणि कोरे धनादेश घेऊन मिळकत बळकावण्याचा प्रयत्न करणाऱ्या मीनाज महंमदगौस शेख आणि यास्मिन अकबर बागवान (दोघी रा. मिरज) या खासगी सावकार महिलांवर मिरज शहर पोलिसात गुन्हा दाखल झाला आहे. याप्रकरणी शैला अनिल मिरजे (वय 40, रा. डोणगे गल्ली) यांनी फिर्याद दिली आहे.

शैला मिरजे यांनी मीनाजगौस शेख आणि यास्मिन बागवान यांच्याकडून 2017 साली 30 टक्के व्याज दराने 20 हजार रुपये घेतले होते. दरमहा सहा हजार रुपये व्याज देण्याच्या अटीवर जुलै 2019 अखेर व्याजाची रक्कम एक लाख रुपये आणि पूर्वी केलेल्या एक लाख रुपयांच्या गहाण कराराची रक्कम अशा एकूण दोन लाख रुपयांचे करारपत्र संबंधीत महिलांनी मिरजे यांच्याकडून करवून घेतले. सदरचे दोन लाख फेडण्यासाठी मिरजे यांना बचत गटाचे कर्ज देण्याचे अमिष दाखविण्यात आले. त्यापोटी संबंधीत सावकार महिलांनी शंभर रुपयांचा कोरो स्टँप, दोन कोरे धनादेश, आधार कार्ड आणि पॅनकार्डचे झेरॉक्स मागवून घेतले.

मात्र, कर्जप्रकरण मंजूर झाले नाही. त्यामुळे मिरजे यांच्या गळ्यातील मंगळसूत्र एका खासगी फायनान्स कंपनीकडे तारण ठेवण्यात आले. त्यावर रक्कम देऊनही मुळ कागदपत्रे संबंधीत महिलांनी परत दिले नाहीत. उलट मिरजे यांना तुमच्याकडून साडेचार लाख रुपये येणे आहेत, असे सांगत सदरची रक्कम देण्यासाठी तगादा लावला. पैशांच्या बदल्यात तुमची मिळकत खरेदी करुन द्या अन्यथा, तुमच्या मुलांना खोट्या गुह्याखाली अडकू, अशी धमकी देऊन सदर महिलांनी शिवीगाळ केल्याची तक्रार मिरजे यांनी शहर पोलिसात दिली आहे. या फिर्यादीनुसार दोघा महिलांवर खासगी सावकार अधिनियाअंतर्गत गुन्हा दाखल केला आहे.

Related Stories

सांगली : बेवारस वाहने हटविण्यास महापालिका अतिक्रमण निर्मूलन पथकाने सुरुवात

triratna

पीक कर्जासाठी किसान सभा आंदोलन छेडणार

triratna

रेठरेधरणच्या ‘त्या’रुग्णाच्या रिपोर्ट बाबत संशय?

Shankar_P

वाळव्यात तरुणावर खुनी हल्ला

triratna

दत्ता पाटोळे खून प्रकरणाची सीबीआय चौकशी करा

triratna

तासगावचा सहाय्यक पोलीस फौजदार ’लाचलुचपत’च्या जाळ्यात

triratna
error: Content is protected !!