तरुण भारत

वाढदिवसानिमित्त राज ठाकरेंचे कार्यकर्त्यांना भावनिक पत्र; ते म्हणाले…

ऑनलाईन टीम / मुंबई : 

सद्य स्थितीत देशात आणि राज्यात कोरोनाचे संकट आहे. राज्यात कालच एका दिवसात 12,207 रुग्ण सापडले आहेत. तर दीड लाखाहून अधिक रुग्ण उपचार घेत आहे. अशा वातावरणात वाढदिवस साजरा करणे मनाला पटत नाही. त्यामुळे वाढदिवशी माझ्या भेटीसाठी येऊ नका. तुमच्या घरीच राहा, असे आवाहन मनसेचे अध्यक्ष राज ठाकरे यांनी केले आहे.

Advertisements


मनसे अध्यक्ष राज ठाकरे यांनी एक पत्रक काढून मनसे कार्यकर्त्यांना हे आवाहन केले आहे. त्यांनी हे पत्रक ट्विटरही टाकले आहे. येत्या 14 जून रोजी राज यांचा वाढदिवस आहे. त्यामुळे वाढदिवशी त्यांच्या कृष्णकुंज या निवासस्थानी कार्यकर्त्यांनी गर्दी करू नये म्हणून राज यांनी हे आवाहन केले आहे. हे आवाहन करताना त्यांनी मनसे सैनिकांना राज्यातील कोरोना परिस्थिती आणि कोरोनामुळे होणाऱ्या धोक्याची सूचना देऊन काळजी घेण्याचं कळकळीचे आवाहनही केले आहे.


राज ठाकरे यांचे पत्र :


दरवर्षी माझ्या वाढदिवसाला आपण भेटतो.तुम्ही फार प्रेमाने अनेक ठिकाणाहून येता. मलाही तुम्हाला भेटल्यावर आनंद होतो आणि अंगात नवा उत्साह संचारतो, उर्जा मिळते. तशी उर्जा जाहीर सभेतही मिळते. पण तिथे तुम्ही नुसते दिसता, भेटत नाही. म्हणून माझ्या दृष्टीने वाढदिवसाचा दिवस तुमच्या सहवासात, तुम्हाला भेटल्याने खरा साजरा होतो. तुमच्या भेटीची मी वाट पाहात असतो. मात्र हेही वर्ष बिकट आहे. मागच्या वर्षीसारखेच. अजूनही कोरोनाने महाराष्ट्राला घातलेला विळखा सोडलेला नाही. लॉकडाऊन उठतो आहे. हळूहळू सगळे पूर्वपदावर यायला लागले आहे. परंतु परिस्थिती अजूनही गंभीरच आहे. आजचेच पाहा, महाराष्ट्रात एका दिवसात काल 12,207 नवे रुग्ण सापडले आणि 1,64,743 जण आत्ताही उपचार घेत आहेत. अशा वातावरणात वाढदिवस वगैरे साजरा करणे मनाला पटत नाही. माझे सहकारी म्हणून तुम्ही हे नक्की समजून घ्याल.


हे वातावरणच असे आहे की आपण सावध असले पाहिजे. खबरदारी घेतली पाहिजे. प्रवास करणे, मोठ्या प्रमाणात गर्दी करणे, गाठी भेटी अशा गोष्टी करणे अजूनही टाळल्या पाहिजेत. म्हणून मी तुम्हाला अत्यंत मन:पूर्वक आणि आग्रहाची विनंती करेन की माझ्या भेटीसाठी घरी येऊ नका. तुमच्या घरीच राहा, जिथे आहात, तिथे सुरक्षित राहा. आपल्या कुटुंबियांची, आसपासच्या परिसरातल्या लोकांची काळजी घ्या. तुम्ही प्रेमाने याल आणि आपली भेट होणार नाही असं नको व्हायला. तुम्ही सर्वांनी ह्या कोरोना काळात जागरुकपणे चांगले काम केलेत, ज्याचा मला फार अभिमान आहे. अशाच कामात राहा, अजूनही आपली माणसं दु:खात आहेत. कुणाची घरची माणसे गेली, त्यात आपल्या पक्षातलेही कितीतरी जण दुर्दैवाने आपल्याला सोडून गेले. तसेच कुणाचे रोजगार गेले, त्या सर्वांना धीर द्या, त्यांच्यासाठी आता करता आहात तसेच काम करत राहा. आजवर राखलंत तसंच परिस्थितीचे भान राखा.


थोड्याच दिवसात मी तुम्हाला भेटणार आहे. पक्षाच्या धोरणाविषयी, नव्या कार्यक्रमांविषयी तुमच्याशी मला बोलायचं आहेच. तोपर्यंत जिथे आहात तिथेच पूर्ण काळजी घेऊन कामात रहा. महाराष्ट्राला आता आपल्या कामातून एक दिलासा देण्याची आणि आश्वस्त करण्याची गरज आहे. म्हणून समाजोपयोगी कामात रहा. त्याच मला माझ्या वाढदिवसाच्या शुभेच्छा म्हणून मी आनंदानं स्विकारीन.


लवकरच भेटू.

आपला नम्र,

राज ठाकरे !

Related Stories

दिल्लीत कोरोना रुग्णांची संख्या 90 हजारांच्या उंबरठ्यावर

pradnya p

शांततेचा जप अन् युद्धाची तयारी

Patil_p

भारतात समूह संसर्गाला सुरुवात : IMA

datta jadhav

राज ठाकरे यांच्या उपस्थितीत हर्षवर्धन जाधव पुन्हा एकदा मनसेत

prashant_c

हॉंगकॉंगकडून एअर इंडियाच्या विमानांवर पुन्हा बंदी

datta jadhav

पंजाबमध्ये कोरोना बाधितांची एकूण संख्या 14, 996 वर

pradnya p
error: Content is protected !!