ऑनलाईन टीम/ तरुण भारत
मुंबई: परिवहन मंत्री अनिल परब (Anil Parab) यांच्यावरील कारवाई ही राजकीय सुडापोटी सुरु असल्याचा आरोप शिवसेना नेते संजय राऊत (Sanjay Raut) यांनी केला आहे. मनी लाॅंड्रिंग प्रकरणी अनिल परब यांच्या शासकीय निवासस्थानी आज पहाटेपासून सक्तवसुली संचलनालयाने छापेमारी सुरू केली आहे. यावरून राऊत यांनी आज माध्यमांशी संवाद साधला. यावेळी त्यांनी भाजपावर टीकास्त्र सोडले.
भाजपवर निशाणा साधताना ते म्हणाले, शिवसेना अनिल परब यांच्या पाठीशी ठाम उभी आहे. या दबावाचा आमच्यावर कोणताही परिणाम होणार नाही.अशा कारवायामुळे भाजप रोज खड्ड्यात जात आहे. सबळ पुरावे असलेल्या जितू नवलानीला कोणी पळवले याचे उत्तर भाजपने द्यावे. फक्त शिवसेनेला त्रास देऊन त्यांना अडचणीत आणायचे आहे. निवडणुकीच्या तोंडावर हे सर्व सुरु आहे. मात्र सर्व निवडणुका सुरळीत पार पडतील, सरकार सुरळीत चालेल.भाजपने तपास यंत्रणेला हाताशी धरले आहे.आम्ही ईडीला काही फाईल्स पाठवल्या आहेत, पण ती उघडण्याची तसदी कोणी घेत नाही अशी नाराजी त्यांनी व्यक्त केली.
अनिल परब यांना दिलासा देताना ते म्हणाले, अनिल परब आमचे सहकारी आहेत. ते कडवट शिवसैनिक आहेत. कॅबिनेट मंत्री देखील आहेत.हि कारवाई सूडबुद्धीने सुरु आहे. ज्या प्रकारे आरोप ईडीकडून लावले जात आहेत,त्याहून गंभीर आरोप भाजपच्या लोकांवर आहेत.पण त्यांना कोणी हाथ लावत नाहीत. आम्ही देखील पाहून घेऊ, इशारा असा राऊतांनी दिला.