ऑनलाईन टीम / नवी दिल्ली :
दिल्लीत मंकीपॉक्सचा पहिला रुग्ण आढळून आला आहे. या रुग्णाला ताप आणि त्वचेवर जखमा झाल्या होत्या. रुग्णाने परदेश प्रवास केल्याची कोणतीही नोंद नाही. त्यामुळे आरोग्य यंत्रणा आता अलर्ट झाल्या आहेत.
केंद्रीय आरोग्य मंत्रालयाने दिलेल्या माहितीनुसार, दिल्लीत 31 वर्षीय युवकाला मंकीपॉक्सचा संसर्ग झाला आहे. या रुग्णावर मौलाना आझाद मेडिकल कॉलजेमध्ये उपचार सुरू आहेत. या रुग्णाला ताप आणि त्वचेच्या जखमांमुळे रुग्णालयात दाखल करण्यात आले होते. चेहऱ्यावरील जखमांमुळे त्याची मंकीपॉक्सची टेस्ट करण्यात आली. या टेस्टमध्ये हा रुग्ण पॉझिटिव्ह आढळून आला. दिल्लीमध्ये मंकीपॉक्सची ही पहिलीच केस असल्यामुळे खळबळ उडाली आहे. या रुग्णाने कुठेही परदेश प्रवास केल्याची नोंद नाही.
भारतातील मंकीपॉक्सची ही चौथी केस आहे. यापूर्वी केरळमध्ये मंकीपॉक्सचे तीन रुग्ण आढळून आले आहेत.
हेही वाचा : शिंदेंचा आत्महत्यामुक्त महाराष्ट्राचा संकल्प ठरतोय फोल, 23 दिवसातच 89 शेतकऱ्यांच्या आत्महत्या