गेल्या दोन दिवसात 860 रुपयांनी वाढ
नवी दिल्ली ः
सोनेदराला पुन्हा एकदा झळाळी मिळाली असून हा दर प्रतितोळा 53,600 रुपयांवर पोहोचला आहे. मुंबईत शुक्रवारी सोनेदर प्रतितोळा 53,730 रुपयांपर्यंत वाढला होता. हा दर गेल्या 27 महिन्यांतील उच्चांकावर गेला आहे. यापूर्वी 18 ऑगस्ट 2020 रोजी सोन्याचा भाव 53,815 रुपयांवर गेला होता. 2021 मध्ये तो 53 हजारांच्या पातळीला कधीही स्पर्श करू शकला नाही. किंबहुना डॉलरच्या घसरणीमुळे जगभरात सोन्याच्या किमतीत वाढ झाली आहे. त्याचा परिणाम भारतीय बाजारपेठेतही दिसून येत आहे. इंडिया बुलियन अँड ज्वेलर्स असोसिएशन (आयबीजेए) नुसार, शुक्रवारी 24 कॅरेट सोन्याची किंमत 53,611 रुपये प्रति 10 ग्रॅम झाली. अवघ्या दोन दिवसात सोने 860 रुपयांनी तर गेल्या दहा दिवसात 1,261 रुपयांनी महागले आहे. 23 नोव्हेंबर रोजी सोन्याचा दर 52,350 रुपये प्रति 10 ग्रॅम होता.