प्रतिनिधी /बेळगाव
सरस्वती वाचनालयाच्या निमंत्रणावरून बेळगाव दौऱयावर आलेले गायक महेश काळे यांनी मंगळवारी सकाळी लोकमान्य सोसायटीच्या गुरुवारपेठ येथील कार्यालयाला सदिच्छा भेट दिली. याप्रसंगी सोसायटीचे उपाध्यक्ष अजित गरगट्टी यांनी त्यांचा शाल अर्पण करून पुष्पगुच्छ व लामणदिवा देऊन सत्कार केला. तसेच त्यांचे शिष्य शिवश्री कंदप्रसाद, प्रल्हाद जाधव व अंकुर चांदे यांचाही सत्कार करण्यात आला.
यावेळी महेश काळे म्हणाले, ‘कटय़ार काळजात घुसली’ या चित्रपटाच्या प्रमोशनची सुरुवात बेळगावमधून झाली. कटय़ारने लोकांपर्यंत माझे गाणे पोहोचविले. यात बेळगाव महत्त्वाचे आहे. शाकुंतलचा पहिला प्रयोग येथे झाला हे सुद्धा विशेष आहे. बेळगाव ही कला आणि संगीत यांच्या दृष्टिने सुपीक भूमी आहे.
या भूमीत अनेक कलाकार घडले आहेत. त्या भूमीतील श्रोत्यांसमोर गाणे सादर करणे, हे नेहमीच आनंददायी आहे.
महेश काळे यांनी सोसायटीच्या प्रगतीबद्दल समाधान व्यक्त करून लोकमान्य सोसायटी व अध्यक्ष किरण ठाकुर यांच्याशी आपले जिव्हाळय़ाचे नाते आहे. सोसायटीने नेहमीच आपली आतिथ्यशीलता दाखविली आहे, असे सांगितले. सूत्रसंचालन समन्वयक विनायक जाधव यांनी केले.
याप्रसंगी संचालक सुबोध गावडे, विनायक धामणेकर, सोसायटीचे सीएफओ वीरसिंग भोसले, सीईओ अभिजित दीक्षित, कर्नल दीपक गुरूंग, प्रभाकर पाटकर, गुरुनाथ पाटील तसेच कर्मचारीवर्ग उपस्थित होता.