विदयुतभारीत तारेचा स्पर्शाने लागली आग
बेळगाव : गवताने भरलेल्या ट्रॅक्टरला विदयुतभारीत तारेचा स्पर्श होऊन लागलेल्या आगीत दोन ट्रॉली गवत व व एक गवताची गंजी जळून खाक झाली. आज (रविवारी) सकाळी ११. ३० च्या सुमारास ही घटना घडली. सुदैवाने कोणतीही जीवितहानी झाली नाही.
मिळालेल्या माहितीनुसार, आज सदर दोन्ही ट्रॅक्टर गवत भरून शेतातून जात असताना विदयुत भारीत तारेचा स्पर्श झाला. त्यानंतर ट्रॅक्टर मधील गवताने अचानक पेट घेतला. बघता बघता आगीने रौद्र रूप धारण केले. या दरम्यान प्रसंगावधान राखून ट्रॅक्टर चालक बाहेर पडल्याने मोठा अनर्थ टळला. तेथे असलेल्या शेतकऱ्यांनी याची माहिती तात्काळ अग्निशमनला दिली. अग्निशमन दलाच्या जवानांनी घटनास्थळी धाव घेऊन आगीवर नियंत्रण मिळविले.
दरम्यान यल्लाप्पा तलवार यांचे दोन ट्रॉली गवत व रामचंद्र गुरव यांची एक गवताची गंजी जळून खाक झाली. तसेच दोन्ही ट्रॅक्टरचे ही मोठे नुकसान झाले आहे. त्यामुळे हे शेतकरी अडचणीत आले असून नुकसान भरपाई देण्याची मागणी होत आहे.