ऑनलाईन टीम/तरुण भारत
वारणा धरणाच्या पाणलोट क्षेत्रात अतिवृष्टी चालू असल्याने, धरणातून सुरु असलेल्या ६८७५ क्युसेक विसर्गा मध्ये वाढ करून विद्युत गृहातून १६६४ क्युसेक व वक्रद्वार मधून ७७८४ क्युसेक, असे एकूण ९४४८ क्युसेक पाण्याचा विसर्ग सुरू आहे.
शिराळा तालुक्यासह सर्वत्र मुसळधार पाऊस सुरू असल्याने धरणाच्या पाणी पातळीत वाढ होत आहे यामुळे आज बुधवार दि. १० रोजी सकाळी ८ च्या दरम्यान विद्युत गृहातून १६६४ क्युसेक व वक्रद्वार दरवाजा मधून ७७८४ क्युसेक, असा एकूण ९४४८ क्युसेक पाण्याचा विसर्ग वारणा नदीत होत असल्याचे सहायक अभियंता एम.एम. किटवाडकर यांनी सांगितले. तसेच नदीच्या पाणी पातळीत वाढ होत असल्याने वारणा नदी काठच्या गावांना सतर्कतेचा इशारा देण्यात आला आहे. तर आज सकाळी ऐतवडे खुर्द येथील वारण नदीचा पूल पाण्याखाली गेला असून चिकुर्डे, काखे, मांगले येथील छोटे मोठे बंधारे पाण्याखाली गेले आहेत.