न्यायाधीश-पोलिसांना धमकाविण्याचा प्रकार
वृत्तसंस्था /इस्लामाबाद
पाकिस्तानचे माजी पंतप्रधान इम्रान खान यांना दहशतवादाशी संबंधित नोंद गुन्हय़ाप्रकरणी 1 सप्टेंबरपर्यंत अंतरिम जामीन मिळाला आहे. एका जाहीर सभेत महिला न्यायाधीश अन् पोलीस अधिकाऱयांना धमकी दिल्याप्रकरणी खान यांच्या विरोधात दहशतवादाचा गुन्हा नोंदविण्यात आला आहे. 21 ऑगट रोजी दहशतवादविरोधी कायद्याच्या अंतर्गत वॉरंट जारी करण्यात आले होते.
वॉरंट बजावण्यात येताच इम्रान यांच्या पक्षाने इस्लामाबाद उच्च न्यायालयात जामीन अर्ज दाखल केला होता. यापूर्वी 24 ऑगस्टपर्यंत त्यांच्या अटकेला स्थगिती दिली होती. पाकिस्तानचे पोलीस कुणाच्या तरी निर्देशावर माझ्या पक्षाच्या नेत्यांना अटक करत आहेत असे म्हणत इम्रान यांनी एका महिला न्यायाधीशाला धमकी दिली होती. न्यायाधीशांनी परिणामांना सामोरे जाण्यासाठी तयार रहावे असे त्यांनी म्हटले होते.