34 हजार 615 कोटींच्या फसवणुकीचा नवीन गुन्हा दाखल
@ नवी दिल्ली / वृत्तसंस्था
डीएचएफएलचे माजी सीएमडी कपिल वाधवान, संचालक धीरज वाधवान आणि इतरांविरुद्ध 34,615 कोटी रुपयांच्या फसवणुकीचा नवा गुन्हा सीबीआयने दाखल केला आहे. या गुन्हय़ामुळे एजन्सीने तपास केलेले हे आतापर्यंतचे सर्वात मोठे बँक फसवणूक प्रकरण बनले आहे. गुन्हा नोंदवल्यानंतर तपास एजन्सीच्या 50 हून अधिक अधिकाऱयांच्या पथकाने मुंबईत एफआयआरमध्ये नोंदवलेल्या आरोपींशी संबंधित 12 ठिकाणी झडती घेतली. या छाप्यांमध्ये अमरेलिस रिअल्टर्सचे सुधाकर शेट्टी आणि इतर आठ बिल्डर्सचा समावेश आहे.
कंपनीने 2010 ते 2018 दरम्यान विविध व्यवस्थेअंतर्गत कंसोर्टियमकडून 42,871 कोटी रुपयांच्या कर्जाची सुविधा घेतली होती, परंतु मे 2019 पासून परतफेड करण्यात चूक झाल्याचा दावा अधिकाऱयांनी केला आहे. कर्ज देणाऱया बँकांनी वेगवेगळय़ा वेळी खाती नॉन परफॉर्मिंग ऍसेट्स (एनपीएस) घोषित केली होती. जानेवारी 2019 मध्ये डीएचएफएलची चौकशी सुरू झाल्यानंतर निधी वळवणे, राउंड-ट्रिपिंग आणि निधीचा गैरवापर केल्याच्या आरोपांवरील मीडिया रिपोर्ट्स समोर आले होते.
सदस्यांनी 1 एप्रिल 2015 ते 31 डिसेंबर 2018 या कालावधीत डीएचएफएलचे विशेष पुनरावलोकन ऑडिट करण्यासाठी केपीएमजीची नियुक्ती केली. त्यानंतर 18 ऑक्टोबर 2019 रोजी कपिल आणि धीरज वाधवान यांच्याविरोधात लुकआउट नोटीस जारी केल्याने त्यांना देश सोडण्यापासून रोखण्यात आले होते.