हुबळी-कर्नाटक / वृत्तसंस्था
कर्णधार प्रियांक पांचाळने 87 धावा व यष्टीरक्षक-फलंदाज केएस भरतने नाबाद 74 धावांची शानदार खेळी साकारल्यानंतर भारत अ संघाने न्यूझीलंड अ विरुद्ध अनधिकृत कसोटी सामन्याच्या दुसऱया दिवसअखेर 6 बाद 229 धावांपर्यंत जोरदार मजल मारली. शुक्रवारी येथे दुसऱया दिवसात 66 षटकांचा खेळ झाला. पांचाळ व भरत वगळता भारत अ संघाचे आघाडी व मध्यफळीतील बरेच फलंदाज निष्प्रभ ठरले. कर्णधार पांचाळने 148 चेंडूत 12 चौकार व 2 षटकार फटकावले तर भरतच्या नाबाद खेळीत 104 चेंडूत 10 चौकारांचा समावेश राहिला. 4 बाद 68 अशी बिकट स्थिती असताना पांचाळ व केएस भरत ही जोडी जमली आणि त्यांनी 117 धावांच्या भागीदारीसह संघाला सुस्थितीत आणले.