संस्कृती बचाव मंच न्यायालयात जाणार
भोपाळ / वृत्तसंस्था
वाराणसीतील ज्ञानवापी मशिदीच्या सर्वेक्षणानंतर भोपाळच्या चौक बाजार येथील जामा मशिदीचेही सर्वेक्षण करण्याची मागणी करण्यात आली आहे. भोपाळच्या या मशिदीत शिवमंदिर असल्याचा दावा करण्यात आला आहे. याप्रकरणी संस्कृती बचाओ मंचचे अध्यक्ष चंद्रशेखर तिवारी यांनी भोपाळचे गृहमंत्री नरोत्तम मिश्रा यांना निवेदन दिले आहे. तसेच याबाबत न्यायालयात याचिकाही दाखल करणार असल्याचे तिवारी यांनी सांगितले.
भोपाळच्या आठव्या शासक कुदसिया बेगम यांनी त्यांच्या हयात-ए-कूदीस या आत्मचरित्रात भोपाळच्या जामा मशिदीतील शिवमंदिर पाडून मशीद बांधल्याचा उल्लेख केल्याचे चंद्रशेखर तिवारी यांचे मत आहे. या मशिदीचे बांधकाम 1832 मध्ये सुरू झाले आणि 1857 मध्ये पूर्ण झाले. येथे मोठे शिवमंदिर होते, असे तिवारी यांनी स्पष्ट केले. आपल्याकडे यासंबंधी लिखित स्वरुपात पुरावे असून यासंबंधीचे दस्तावेज न्यायालयासमोर सादर करण्यास आपण तयार असल्याचे त्यांनी स्पष्ट केले.