दोघे जखमी, गतीरोधकामुळे मोठा अपघात टळला
घुणकी प्रतिनिधी
पुणे-बंगळूर महामार्गावरील किणी (ता. हातकणंगले) पथकर नाक्यावर पथकर देण्यासाठी उभारलेल्या वाहनांवर ब्रेक निकामी झालेल्या शिवशाही बसची पाठीमागून धडक बसल्याने कारमधील दोघेजण जखमी झाले. ही घटना चारच्या सुमारास घडली.
घटनास्थळावरुन मिळालेली माहिती अशी–पुण्याहून कोल्हापूरकडे प्रवाशांना घेऊन निघालेल्या शिवशाही बसचा (एम-एच-०७-सी ७१४६) किणी पथकर नाक्याजवळ आली असताना ब्रेक निकामी झाला. त्यामुळे पथकर देण्यासाठी उभारलेल्या वॅगनार मोटारगाडी (एम-एच-०३-सीजी २८१५) ला धडक दिली. त्यातील दोघेजण जखमी झाले. त्यांना शासकीय रुग्णालयात दाखल करण्यात आले असून त्यांची नावे समजू शकली नाहीत.
शिवशाहीने वॅगनारला धडक दिल्यानंतर हुंडाई मोटारगाडी (एम-एच-४६- बीक्यू १९०९), कार (एम.एच.०४-डी.जे. ७९७८)यासह अन्य दोन गाड्या एकमेकांना धडकल्या. या सर्व कारचे मोठे नुकसान झाले. दरम्यान पथकर नाक्या जवळील गतीरोधक व चालकाच्या प्रसंगावधानाने गाडीची गती कमी केल्याने मोठा अनर्थ टळला. सदर अपघाताची नोंद वडगांव पोलिसात झाली आहे.