वसगडे/प्रतिनिधी
पलूस-सांगली राज्यमार्ग क्रमांक १४२ वरील वसगडे ता. पलूस येथील कृष्णा कॅनॉलवरती नाबार्ड योजने अंतर्गत छोट्या पुलाचे बांधकाम गेले दोन महिने झाले सुरु हाेते. खाेडशी धरणातुन कृष्णा कालव्यातून मार्च आवर्तनाचे येणारे अडीच टीएमसी पाणी काल रात्री वसगडे शिवारात पाेहचले. परंतु पुलाचे काम करणार्या ठेकेदाराने कॅनॉलमध्ये आडवी माती टाकल्याने माेठ्या प्रमाणात पाणी तुंबले आहे. त्यामुळे येळावी वाटेपर्यंत पाण्याचा फुगवटा निर्माण झाला आहे.
मध्यंतरी पावसामुळे कॅनॉल फुटून ग्रामस्थाच्या घरात पाणी शिरल्याची घटना घडली हाेती. आता कृष्णा कॅनॉलचे पाणी तुंबत असल्याने ग्रामस्थांमधून चिंता व्यक्त हाेऊ लागली आहे.
भरावासाठी टाकलेली माती काढून पाण्यासाठी वाट करुन देण्याचे काम युध्द पातळीवर सुरु आहे. सार्वजनिक बांधकाम खाते जलसंपदा विभागाच्या समन्वयाअभावी हजाराे लिटर पाणी वाया जाऊन शेतकरी अडचणीत येण्याची शक्यता निर्माण झाली आहे.