कार्यकारी अध्यक्ष हर्ष महाजन यांचा भाजपप्रवेश
वृत्तसंस्था/ नवी दिल्ली
हिमाचल प्रदेश काँग्रेसचे कार्यकारी अध्यक्ष हर्ष महाजन यांनी पक्षाला रामराम ठोकला आहे. त्यांनी दिल्लीत भाजपचे सदस्यत्व स्वीकारले आहे. केंद्रीय मंत्री पियूष गोयल यांच्या उपस्थितीत महाजन यांनी भाजपमध्ये प्रवेश केला. हर्ष महाजन हे हिमाचलमधील काँग्रेसचे दिग्गज नेता होते.
हर्ष महाजन हे माजी मुख्यमंत्री विरभद्र सिंह यांचे निकटवर्तीय मानले जायचे. हिमाचल काँग्रेसमध्ये तिकीटांची विक्री होत असल्याचे म्हणत महाजन यांनी माता-पुत्राचा पक्ष झाल्याचा आरोप केला आहे. विरभद्र सिंह यांच्या निधनानंतर राज्यातील काँग्रेसमध्ये गळती सुरू झाली आहे. काँग्रेसमधील वरिष्ठ नेते स्वतःला मुख्यमंत्रिपदाचा दावेदार मानत असल्याने गोंधळ निर्माण झाली आहे. तर तिकिटवाटपावरून काही नेते नाराज असल्याचे सांगण्यात येते.
काँग्रेस पक्ष आता दिशाहीन ठरला आहे. पक्षाला व्हिजन तसेच नेतृत्वही नाही आणि तळागाळात काम करण्यासाठी कार्यकर्ते देखील नाहीत. दिल्लीप्रमाणेच आता हिमाचल प्रदेशातही काँग्रेस पक्षामध्ये माता-पुत्राचे नियंत्रण आहे. काँग्रेसचा एक गट तिकिटविक्री करत असल्याचा आरोप हर्ष महाजन यांनी केला आहे.