ऑनलाईन टीम / तरुण भारत :
पुण्याच्या विश्रांतवाडी येथील आरटीओ कार्यालयाच्या आवारात आज दुपारच्या सुमारास भीषण आग लागली. या आगीत आरटीओने जप्त केलेली दहा मोठी वाहने जळून खाक झाली. अग्निशमन दलाच्या जवानांनी आगीवर नियंत्रण मिळवले असून, आगीचे कारण अद्याप अस्पष्ट आहे.
विश्रांतवाडी फुलेनगर येथील आरटीओ कार्यालयाच्या आवारात आज दुपारी अचानक आग लागली. काही क्षणात आगीने उग्र रुप धारण केले. रविवार आणि मकरसंक्रांतीची सुट्टी असल्याने कार्यालय बंद होते. त्यामुळे ही बाब स्थानिकांच्या लवकर निदर्शनास आली नाही. परिसरात धुराचे लोट पसरल्यानंतर स्थानिकांनी अग्निशमन दलाला यासंदर्भात माहिती दिली. अग्निशमन दलाने तात्काळ घटनास्थळी धाव घेत काही वेळात आगीवर नियंत्रण मिळवले. मात्र तोपर्यंत आरटीओने जप्त केलेली 10 वाहने आगीत जळून खाक झाली. यामध्ये 4 लक्झरी बस, 4 कार, 1 टेम्पो आणि 1 डंपर यांचा समावेश आहे.